何展睿負傷上陣，親自包辦新歌《動人的眼淚》MV

唱作歌手何展睿(Steve)為即將推出新歌《動人的眼淚》拍攝MV，這首新作被視為他的創作計劃「愛情六重奏苦情單戀第三回」。

Steve表示今次全情投入新歌及MV錄製的工作：「音樂方面，歌曲將會推出兩個完全唔同風格既版本，自己一樣參與當中曲詞編監唱；而MV拍攝方面，經過之前為自己MV編劇既經驗，今次參與度更加高，完全地擔當導演同編劇角色，真係做到自編自導自演。因為自己好重視新歌，又準備配合新碟推出，所以自己都親自去揀拍攝場地、諗情節、搵道具、服裝等。雖然全程投入製作係好忙同辛苦，但好享受當中過程，因為可以節省時間，最重要係做到自己心目中既要求，係一件好滿足既事！」

此外，他說：「啱啱上個月先拍完之前歌曲既MV，只係得半個月時間準備，好彩新歌係幾年前完成，腦海裡已經有好多故事情節想呈現，所以用咗一個星期就諗好劇本，地點都已經決定去一個有文青色彩既攝影棚，但因為疫情令到租務上出現阻滯，突然間要改變拍攝地點，劇本又要臨時修改。收到消息，個刻好大壓力，即刻去咗一趟大澳，放鬆兼搵創作靈感。我好鍾意係海邊吹吹風，清空思緒之後先可以搵到靈感，唔可以強迫自己係有限時間內完成工作。好彩最後都大功告成，一日就重新修改好劇本！」

講到新歌MV情節上，歌曲是講述單戀，MV中需要跟手機作「對手戲」：主角需要一個人在家百無聊賴，不停等待對方手機訊息。而最精彩環節，MV裡他會親身上陣拉奏小提琴以帶出歌曲古典氣息，因為Steve本身教授古典音樂，音樂編曲及創作也加入古典元素。但Steve表示：「幾日前踩單車，自己諗緊拍攝既野，霎時間失神，無留意天雨路滑，唔小心就炒車，手掌、手臂流曬血，加上個陣好大雨，真係好狼狽！好彩無傷到筋骨，只係痛左幾日，但傷口好大範圍仲未埋口。」而演奏小提琴部分，Steve攜同兩位學生一起合奏，希望在視覺上添加新鮮感，更藉此為學生提供演出機會，提昇他們自信心！