何展睿用「愛」抗疫，派發自製消毒水

唱作歌手何展睿(Steve) 出道至今於各地進行多場巡唱，希望用音樂為香港發放正能量，但近期疫情緣故，巡唱也被迫延期。他表示近期從新聞得知不少市民為短缺之消毒用品而煩惱，故早前於網上研究銀離子消毒水的醫學價值，見到近日不少專家於網絡大力推介，故決定親身製作，希望用另一種方式發放愛。

Steve 表示由準備用料，到訂購膠樽都親力親為：「當中材料鱷魚夾網上話深水埗好易揾到，點知搵咗十幾間都搵唔到，準備放棄之際最後一間竟然買到！另外，原本想做幾百支消毒水， 但有批膠樽被關員誤為液體，要打回頭，所以做呢支消毒水真係一波三折！」。

而消毒水將率先分發給他的音樂中心學生、家長使用，他表示學生及家長都好開通同好學：「坊間好多興趣班因為疫情而停課，但我啲家長明白學習樂器只係單對單，上堂唔係一大班人，加上音樂中心做足防疫措施，所以唔擔心。佢哋反而想趁呢個空餘時間加堂同埋學多樣樂器， 唔想浪費時間，我都非常安慰！」。

最後，Steve表示近期非常感動，因為疫症期間感受到「互助互愛」精神：「有好多海外朋友關心慰問，亦有家長托朋友幫手買口罩比我，所以我都會落力去製造消毒水，希望稍後時間可以派發比老人家同埋弱小社群，幫多啲人呀！」。