UTO娛樂|超人的能量 | 林超榮: 一人一萬奉旨消費

　　　言猶在耳。疫情嚴峻，觀音今年不借庫，市民歎謂，財運不好，必然手頭拮据。幸好，上帝說，觀音關了一扇窗，財爺打開一度門，你借不到錢，我索性派錢，一人一萬，不是借，而係送。

二○一一，財爺派六千，我已經開心不已，真係受寵若驚。有所不同，上一次，係錦上添花，庫房滿瀉，一人六千。今年大手筆，加碼一萬，在此百業肅條，經濟不景時，一人一萬，就係雪中送炭。加上，政府派完錢之後，都自身難保，庫房出現十五年罕見赤字。

對於大部份打工仔或小店老板而言，面對前景不明，身同感受，一人一萬，都感到鬆一口氣，雖然係杯水車薪，總算解決燃眉之急，際此艱難環境，過得一步得一步。

不過，對於正在求學又剛滿十八歲的年輕人如我三個女兒，向來無憂無慮，忽然天上掉下一萬蚊，一面拍手叫好，一面喜上眉梢，滿肚密圈，如何「豪花」一番。

在我們年輕時代，兼職賺錢的，都是幫補家計，額外收入，更加盡快上繳。我忽然覺得，「幫補家計」這一個名詞好像已經消失多年。

我問編劇，度條橋令子女的一萬蚊上繳作家用，你估有無可能？

「天方夜譚！」朋友說：「我個仔大條道理話，老竇，我哋要聽政府話，拿到錢，要快快出去消費，回餽社會，總之，我不會上淘寶網購，就係盡公民責任。」

林超榮