朱晨麗新劇《大醬園》開播 感謝導演及工作人員敬業精神

TVB當紮花旦朱晨麗(朱朱)一劇接一劇，朱朱在剛播完的《多功能老婆》劇集中演技備受讚賞，今天(20日) 開播另一部民初新劇《大醬園》乘勢追擊，TVB唔單止撮合朱晨麗與何廣沛這對緋聞男女在劇中由冤家變成夫妻，還安排兩人一場瀑布出浴戲。

劇情講朱朱一向都在瀑布下的水潭沖涼，朱朱如常在水潭沖涼，點知沖沖下擰轉臉赫然發現冤家何廣沛正在游泳，令到朱朱更加討厭佢，因為劇中朱朱一直未曾拍過拖，但被呢個男仔睇曬自己全相，就要對朱朱負責任，朱朱無可奈何下嫁何廣沛。雖然婚後朱朱仍然好討厭老公，但相處久了漸漸被老公改變了自己的內心世界。

拍攝呢場出浴戲，朱朱十分感激導演及工作人員：「我哋身後瀑布好靚，但水流好急，如果唔小心跣親或差錯腳就會好危險，導演同所有工作人員好有專業精神，為咗一個最靚鏡頭，完全不顧自身安全，好危險咁擒上擒落攞最靚角度，大家知道我唔識游水又唔識水性，特登請咗一位救生員，公司好鍚我，好多謝公司，拍攝時候救生員一直拉著我，驚我跣一跣就會被水沖走，正式開拍時才鬆手，呢場戲拍出來環境好靚好靚，好感謝大家的敬業精神。」

朱朱也很感謝何廣沛：「成個畫面好溫馨，我哋拍攝時需要鬧交，唔鍾意佢，但一停機佢（何廣沛）即刻過嚟拖著我隻手，扶著我，好有男士風度，雖然拍嗰日係最凍，但感覺好溫暖，因為呢場戲係講沖涼，唔可以穿任何救生衣及救生用具，身上冇入何救生用品，工作人員同何廣沛都好細心，一停機就拖實我，驚我畀水沖走。」