施匡翹處女單曲《初心》拍MV 浪漫得黎又驚險

臻世娛樂新人女歌手施匡翹Zaina與師姐蔣嘉瑩合唱《假如真的再有約會》反應相當理想，師妹施匡翹的獨特歌聲及其清純玉女形象引起樂迷關注，唱片公司乘勢追擊為施匡翹灌錄首支個人單曲《初心》，並邀請得著名音樂人張家誠作曲及監製。

Zaina日前為處女單曲《初心》拍攝MV，第一站在牛頭角鬧市及公園取景，由晨早拍到中午時份，室外氣溫高度攝氏34度的烈日高空下，Zaina同所有幕後工作人員都熱得全身濕透，大家足足暴曬幾個鐘險中暑。

故事講述Zaina在鬧市馬路中心與童年時倆小無猜的男朋友擦身而過，令她回憶起童年時與男朋友仔的一段純真初戀，一齊在公園玩耍，而她亦一直帶著男朋友仔所送的手繩。

Zaina與初戀男朋友馬路相遇呢場戲，講述Zaina拿著一份文件趕住過馬路返公司，行到安全島時，與一位同樣過馬路的男子相撞，撞跌手上的文件，對方好有紳士風度地踎低幫她執回，原來呢位男子就是她的初戀男朋友仔。

Zaina笑言：「呢場戲睇嚟好浪漫，其實拍攝時又熱又驚險，因為差不多接近中午，太陽喺正頭頂，再加上車輛噴熱氣，熱到大家幾乎中暑，我地不停來來回回拍攝，又曬又多車，交通燈一轉燈，我地就即刻衝過去拍，諗番起其實都幾危險，不過拍出來效果好好，感覺好似拍戲咁，我第一次拍戲咋，希望冇接到投訴啦，哈哈！」覺得自己演技點樣？Zaina笑曬謙稱：「有待改進，哈哈！」

施匡翹首支個人新歌《初心》，邀請到張家誠 (Alan Cheung)擔任監製、作曲及編曲，龍明填詞。施匡翹表示很喜歡《初心》這首歌，完全寫出了自己感覺，非常感謝張家誠及龍明。