【UTO |娛樂|浪漫婚活】網紅插畫師Johnee：「我嘅人生由我自己嚟負責！」

【UTO |娛樂|浪漫婚活】網紅插畫師Johnee：「我嘅人生由我自己嚟負責！」

網紅插畫師Johnee除了出名幫人畫食字gag人名之外，同時亦擁有多重身份，佢係插畫師、動畫師、教師、活動主持、唱作歌手及KOL，甚至曾出演電影狂舞派3。

Johnee曾被內地一個交友實驗真人show邀請做嘉賓，內容係3男3女一齊住喺間豪宅入面，相處3日3夜，中間會有一些遊戲環節讓男嘉賓參與，佢表示係一次特別嘅體驗及嘗試。

畫十晚通頂收幾萬報酬

出道十年嘅插畫師Johnee覺得，隨住社交平台嘅興起，做創作嘅人唔需要擔心冇平台去發佈作品，而且仲會揾到自己第一班嘅fans base，亦會開始有品牌留意到，有機會有一啲聯乘嘅合作從而獲得工作嘅機會。但隨住近年KOL嘅興起，插畫師呢個行業都被歸類到與KOL齊名去爭豔鬥麗。工作可能收幾萬蚊，畫插畫要通幾十晚頂，但其他KOL影張靚相就有一樣嘅報酬，所以呢個行業確係比以前有更大競爭。

寄語年青人: 努力經營夢想

Johnee鼓勵時下嘅年青人：「如果未唸到將來嘅發展路向唔緊要，咁就專心讀好書，考好個試，就會有一條保險又安全嘅路，就一定唔會需要太擔心將來。但如果你係一個有想法嘅人，請你喺仲後生嘅時候，跟隨自己意向去經營自己想做嘅事。其實工作係佔左人生三分一嘅時間，如果將來嘅工作係自己唔鐘意或唔快樂嘅，再多嘅人工，你都係要用返嗰d人工去買返d快樂去慰藉自己；如果你係做緊你自己覺得有成就感或揾到自己價值嘅工作嘅話，即使再過程辛苦，你都會覺得係快樂，行到一條屬於自己嘅道路。」

對於喺香港從事藝術，Johnee家人唔支持？喺Johnee剛剛大學畢業嘅時候，其實自己已經確立左目標，要開自己嘅動畫工作室。於是媽媽做左一場鴻門宴，想勸Johnee正正經經揾份工，做創作太唔穩定，於是Johnee就拍枱話：「我嘅人生由我自己嚟負責！」，之後再解釋自己嘅planning，媽媽就比一年嘅時間Johnee自己經營工作室。結果佢喺嗰一年嘅時間，用佢獨特嘅風格殺出新血路，成功得到好多媒體嘅訪問及獎項，媽媽亦再冇投訴。