謝家俊感謝《全民造星》導師提點獲益良多

2018-10-31 浩楠

謝家俊Oscar ，讀Image design出身，試過入行做過服裝助手、修圖之類嘅工作，先發覺原來有好多野同自己讀書時候嘅野有好大分別，開始懷疑自己係唔係真係可以做落去，所以當時毅然地飛左去澳洲working holiday，係果度同香港嘅生活節奏唔同，有更多嘅時間令到我諗清楚自己需要啲乜野，最後決定返到香港要做返最初心嘅事，就係表演。

點解會參加全民造星
係澳洲返黎之後都斷斷續續有啲表演嘅工作做，例如唱下餐廳、活動，但其實機會並唔多，始終冇咩人知道你係邊個，試過做過最大型嘅表演就係今年初做左套春天實驗劇團嘅音樂劇《Beyond日記之海闊天空》其中一角，當我做完依套劇更加相信自己係非常熱愛唱歌同做戲，完左無幾耐見到有全民造星嘅Casting，其實一見到係非常之激動，因為係香港有唱歌跳舞各類比賽，但綜合咁多元素嘅比賽好像韓國101、大陸偶練之類嘅節目，我真係第一次見，有咁大嘅平台、有好有經驗嘅導師、製作組同好多志同道合嘅參賽者，可以表演俾大家睇之餘仲可以互相交流學習，所以我就好想把握依個機會，參與其中

係全民造星入面有啲咩得著
其實一開始我係純粹將個節目當比賽咁看待，目標都係將所有嘅表演做到最好為止，所以對待每一個表演都好嚴厲，亦都好盲目地爭取每個機會，直到入到40強開始分組之後，就發現原來自己一直只望一點進發嘅時候，有好多野都忽略左，自己對表演既執著加上一路以來說話太率直嘅壞習慣，就會令其他人感到我唔友善，慶幸嘅係有參賽者同工作人員嘅提點，可以俾自己好好咁去留意，去改善自己嘅缺點!

係才藝方面，我好多謝10位導師都有好多提點嘅就話，特別多謝A組嘅導師，係節目之前我係完全未試過跳舞，所以由零到一都算係進步啦，多謝Sunny老師教我地跳舞嘅態度，馬老師除左幫我地造型之外亦有俾功課我地叫我地改善身型，令到自己上鏡更有自信，平時仲同我地打成一片真係好好玩，而唱功同演技係我覺得學得最多嘅野，劉美君老師同火火老師係課餘嘅時間都會抽空幫我地練習，感受到佢地真係想係僅有嘅時間入面俾最多嘅嘢我地帶走。直到我完左全民造星既錄製，係其他地方表演時都運用緊佢地俾我嘅野，真係獲益良多！

完左全民造星有咩搞
係我55強入40強嘅時間，表演嘅果首歌《一個人》就係我細個果陣作落嘅旋律黎嘅，因為全民造星促使我完成左一個短版本，呢首歌係講夢想同現實之間嘅平衡同埋期盼，希望大家聽完會重拾初衷，產生共鳴，係有限嘅生活條件當中繼續前進，雖然表演途中出現左一個小插曲，不過出到黎大眾對首歌嘅反應都唔錯，所以而家全力做緊依首歌，一手包辦曲詞編唱，加埋另外兩首原創歌，以一個唱作歌手嘅名號派歌，希望派歌既時候,大家會喜歡! 除此之外都繼續係各個平台表演同大家見到，詳情都會係Facebook page (Oscar Tse 謝家俊)同instagram (oscartkc71) update 希望大家密切留意！