王梓軒邀傷健表演者齊追夢 為截肢歌迷送祝福

王梓軒（Jonathan）日前推出全新廣東歌《寄居太虛》，為配合追夢的歌詞內容，Jonathan邀請數位傷健表演者拍攝短片，透過演繹新作鼓勵追尋夢想的勇氣：「佢地真係好勁，有一位係聾人舞者，我地係透過手語去同佢溝通，比佢感受歌曲的節奏感，再編排一段舞步。而另一位係用義肢去拉小提琴，我好幸運有健全身體，都要花幾年先學識拉直個弓，佢用義肢拉出咁好聽音樂，個份恆心真係好堅強。」

短片中各傷健表演者都分享「追夢」的經過，令王梓軒大為感動，而拍攝期間為有更好演出，Jonathan亦化身做收音師，紀錄傷健表演者努力排練的成果：「我有諗過如自己身體有缺陷會點算，可能藝人呢個工種係幾高危，爆破你又驚燒親、騎馬又可能會整親，就算唔好彩都應該唔會影響我工作，因為現今社會都接受傷健人事，所以做唔做到就在乎自己的決心，而唔係懷疑自己的能力。」

王梓軒就話新歌靈感來自一名截肢歌迷，亦希望透過新歌為她打氣：「我在社交網站收到私訊，佢話家姐係我Fans，不過早前有意外要截肢，而屋企仲有個一歲囡囡照顧。我聽完成件事好心痛，但覺得即使幾咁不幸，都要堅強活下去，所以就寫了呢首歌，亦邀請傷健人士表演，為她送上祝福。」