袁晴晴想拍公主風寫真

袁晴晴Coco　日前出席寫真月刊週年紀念活動。近日CoCo被瘋狂粉絲公開求愛的短片在網絡間瘋傳，令CoCo一時之間紅遍各大社交平台同討論區，被一眾網民議論紛紛，甚至連台灣新聞界都報導，風頭認真一時無兩。
見到CoCo當日表現比較低調，喺大會佈景板簽名同俾一眾攝影師影完相就坐埋一邊，無乜同其他人social。CoCo表示：「原本今日唔諗住出席嘅，一來未病好，二來知道近日多咗人留意自己同成為話題，想低調少少先！不過最後有朋友叫我陪佢嚟，叫我見吓人同打個招呼啦！」問CoCo有份拍該本寫真？會唔會有大尺度拍攝？CoCo話：「暫時我未拍過呢本寫真，不過頭先大會都邀請我一齊祝酒影大合照，話大家未來有機會合作，所以都唔排除將來會拍！」繼續行性感路線？「其實唔係想行sexy路線，但如果效果靚同grand同可以嘅，我鐘意girlish同公主風多啲！」
活動期間不停都有好多人認得CoCo，兼且上前搵佢影合照，而CoCo都無拒絕粉絲要求有求必應，態度都幾親民。網上對CoCo嘅評論好壞參半，問佢而家多咗人認得，會唔會怕行出街俾人鬧？「其實都唔會嘅，出街認得我嘅人都好nice，有好多仲讚我真人靚過上鏡，我都好開心佢哋認得我搵我合照！」咁而家紅咗有咩打算？「其實唔覺自己紅咗，只係意外多咗人識我，都多謝大家留意我。嚟緊我會繼續努力，俾心機keep fit、學唱歌、跳舞同演戲，想由模特兒轉型做歌手同演員，成為歌影視多方面發展嘅artsit，希望大家見到我嘅進步！」