王祖藍李亞男做人成功
結婚三年多的王祖藍和李亞男，今午於社交網宣布有喜，是日更是二人拍拖九周年紀念日，選擇在如此特別的日子公布喜訊，著實相當浪漫。對於結婚三年多終榮升爹哋，祖藍笑謂：「首先好感恩啦，可以喺拍拖九周年紀念日去宣布呢件事，我哋拍拖嗰時係2009年，咁啱9年後有個小朋友，咁希望所有嘢都可以長長久久啦。亦都好感謝上帝，幫我哋安排晒所有嘢都喺計劃入面進行，之前應承過LEANNE搬出嚟二人世界之後，過兩年左右先有小朋友，依家真係實現到，真係好感恩。」祖藍又笑謂其公司十分旺丁：「我哋先後有兩個員工有咗，依家計埋我老婆就三個人，咁如果想生B，入嚟我公司做啦！」祖藍更叮囑大家幫忙「睇住」老婆，盡顯「暖藍」本色：「做媽媽真係好辛苦架，佢為BB付出咗好多，又睇書啦，又改變自己飲食習慣啦，又好緊張去預備好多嘢啦，所以麻煩大家照顧吓佢啦。」祖藍亦又忘搞笑本色謂：「大家最近除咗睇法國定克羅地亞贏呢？我建議開多個盤，就係究意將來BB嘅高度係會似我定似阿媽呢？相信都幾啱用嚟打牙骹戰。」
而向來十分喜歡小朋友的李亞男則表示：「好開心終於做媽媽喇，第一時間知道嗰陣真係好驚喜，同埋有啲唔敢相信。因為我哋雖然係PLAN今年做爹哋媽咪，但冇諗過咁快就實現到，真係好感恩。其實仔定女我都冇所謂，因為我都會好鍾意。最緊要係BB嘅成長過程夠健康，同埋佢嘅成長夠開心快樂。」
李亞男又謂已向AMAZING ESTHER一眾好姊妹分享喜悅：「我有向LINDA同宋熙年取經，問定佢哋有咩嘢唔食得，同埋可唔可以做運動，真係好多好多問題想問，始終自己冇經驗。」
她又謂為了BB著想，已對十分喜歡的食物盡量SAY NO：「我食少咗好多甜品，同埋飲少咗好多咖啡呀，我以前可以一日飲幾杯架。雖然呢啲都只係好小嘅事，但已令我體會到做媽媽係需要付出好多嘅愛。」李亞男又承諾現階段會好好TAKE CARE自己，多點休息，果然為升呢媽咪做足準備。
圖片CREDIT: 《時尚新娘》
