汪明荃百老匯式演出 澳門載歌載舞

汪明荃「50週年 The Timeless Concert 2018 － 澳門站」前晚（23日）假澳門威尼斯人金光綜藝館舉行，全場爆滿，來自各地「姐迷」前來捧場，高舉「Liza」、「熱咖啡」、「50週年」和「PinkLady」等，各式各樣燈牌在台下打氣，非常熱鬧。而本周末（30日）阿姐將首次踏足廣州舉行個人演唱會，她非常興奮和期待，連老公羅家英亦在微博為老婆打氣，呼籲鄉親父老捧場！

即將71歲生日的阿姐，入行超過50年，前晚澳門演唱會唱足3小時，分為懷舊國語金曲、經典電視劇金曲、電影歌曲、粵劇、勁歌熱舞等多個環節，她換了8個造型，演唱超過30首經典金曲，而且勁歌熱舞，超人的體力和毅力令人佩服，連老公羅家英在台上不忘賣口乖讚老婆人靚聲甜，外剛內柔，氹得阿姐每次出場都笑到甜絲絲。

阿姐：「今次將香港演唱會帶澳門表演，但因為香港紅館係四面台，今次係三面台，所以舞台重新設計，亦改咗少少舞蹈編排，可以做到百老匯感覺，而且成隊Live Band搬到台上喺我身後面，我唱起嚟更有feel。」阿姐好朋友森森和斑斑兩姊妹，以及1997年港姐冠軍翁嘉穗和丈夫鄔友正等都在台下欣賞，完騷後他們在休息室敍舊。對於好朋友捧場，阿姐高興地說：「森森斑斑唔單只係我好朋友，森森更加係我讀『麗的映聲』第一期藝員訓練班同學，相識超過50年，佢哋知我鍾意飲茶，送咗茶葉和扮靚小禮物畀我，好窩心！ 」而老公家英哥亦好窩心，他百忙中抽時間陪阿姐由綵排到出騷站台，阿姐坦言好感動，她說：「佢真係好唔話得，今晚做完自己嗰部份就趕住走，因為要一早飛去銀川，嚟緊廣州站佢又係咁趕，所以我好感謝佢！」

此外，本周末舉行巡唱廣州站的「中山紀念堂」對於阿姐甚具意義，她於1984年在此出席「詩與歌朗誦晚會」，擔任壓軸表演嘉賓，亦是當年少數被邀請到內地表演的香港藝人之一，令她非常難忘。她說：「相隔34年，今次汪明荃以個人演唱會喺咁有歷使價值嘅場館舉行，我真係好開心！」