黃建東首次唱伊館被困後樓梯

藝人黃建東 (Derek) 最近為區瑞強《粵唱越經典演唱會2018》擔任表演嘉賓，初次踏上伊館台板非常興奮，但出場前卻發生驚險事：「因為第一次上伊館唱歌，自己唔係歌手要做足準備，所以特別搵地方開聲。工作人員帶我到後樓梯任我嗌，點知開完聲之後發覺度門鎖咗。嗰陣差唔多要上台，我喺裏面大叫大嗌都無人發現，又完全冇人經過，台上又有歌手唱緊歌好大聲。好彩嗰度接收到電話，工作人員都要搵一輪先搵到我，出返嚟嘅時候嚇到全身標冷汗。」Derek話好彩嗰陣係綵排，如果正式演出都唔知點算。不過很多網友留言話就算他被困成件事都會變得好搞笑，令Derek哭笑不得。
今次是 Derek第一次唱伊館，與一眾主持大唱經典串燒廣東歌：「好多謝 Albert俾呢個機會我哋，做歌手唱演唱會好high好正，同平時做演員或者主持好唔同。」適逢演唱會撞正母親節，Derek未有時間同媽咪慶祝，黃媽媽不但不介意，反而入場看了兩次支持仔仔，Derek大表感動：「爹哋媽咪真係好支持我嘅演藝事業，知道可以喺演唱會唱歌好難得，除咗入場幫我影相拍片，仲充當我嘅粉絲大叫我嘅名，令我喺台上充滿力量。媽咪星期六睇完一場，星期日母親節正日唔介意再入場支持我，令我又興奮又感動。所以嚟緊要給媽媽買份禮物，希望俾個小驚喜補祝母親節。」

Derek今年年頭曾話過要擺多啲時間喺音樂方面，結果真的多了很多唱歌機會，非常感恩。