許嘉浩任世界盃節目主持 難忘小學日日「踩波車」

距離四年一度的全球足球盛事世界盃剛好仲有一個月在俄羅斯開鑼。形象指導兼藝人許嘉浩(Karl)被電視台邀請擔任世界盃節目主持，節目六月份起將於面包台聯同國內多個電視媒體播放。

小學時期就讀聖類斯小學的Karl話學校出名在中西區擁有一個最大巨型的足球場，大部份同學們一番到學校就約埋跑去足球場踢波。返學上堂前去踢，小息又去踢，放學又急急跑去踢。最深刻仲係上小學第一日去到學校見到個咁大的足球場就奮不顧身一支箭向前跑，卻睇唔到有一大級，立即跌倒大字型瞓在足球場上，仲要校長幫手貼膠布。

可能又係男校，男仔踢波日日都出盡力，那些年一個星期肯定有兩、三日「踩波車」或隻手落地手指「篤魚蛋」，手腳流血損哂，逃人仲以為呢個小朋友成日打架。問到踢波叻唔叻，Karl話:「一般般啦。小六發育期時突然聽到補習哥哥話日日用腳鏟波踢波隻腳會變短，會變矮仔。就係呢個兒時無稽既笑話，加上升上中一後又無左個巨型足球場，咁就愈黎愈少踢，反而轉左要跳高殺球既羽毛球啦。」

節目中Karl與專業國際球證及評術員聯合主持，仲有一眾香港、內地、台灣和外國的「世波女」一齊激烈玩遊戲，到時真係唔知睇踢波定波濤洶湧的畫面。Karl更謂爸爸也很喜歡在深夜追實直播球賽，一齊飲住啤酒食住花生咁睇波。睇到興起仲會估下邊隊蠃，但強調絕不賭錢，最多輸左要山長水遠買馳名的小炒或打冷宵夜。問到會捧邊隊場? Karl說:「細個捧巴西隊場，話哂巴西係足球之國。今屆黎到第21屆，幾睇好阿根廷的神射手美斯(Lionel Messi) ，剛剛過30歲仲算fit，希望佢今屆能打破紀錄，攞到世界大賽奬杯。」