陳炳銓燒衣慶生日 王宗堯、吳海昕蠱惑送驚喜

王宗堯、陳炳銓（Danny）、吳海昕（Sofiee）及張敬仁早前拍攝Viu TV劇集《賤民20》，在紅磡一間長生店取景。適逢當日是陳炳銓生日，劇組刻意安排Danny開工拍燒衣戲份，再由同劇演員送上驚喜，王宗堯話見到陳炳銓到場面黑黑，擔心對方為開工推掉約會：「我都有試探問佢係咪約咗女友，佢話對方都要開工！咁我就安樂晒，一於玩大佢！事緣佢爭好少戲份未拍，我地專登今日叫佢補拍呢場燒衣戲，後生仔都百無禁忌啦！」。

吳海昕就負責捧蛋糕現身，令陳炳銓驚喜不已，Sofiee話事前「扮無野」係演技的考驗：「送蛋糕個刻我地收晒工架喇，之前片場見到佢都唔笑、唔講生日快樂，等佢以為全世界都唔知佢生日，到補拍單人戲份個陣我就化身Birthday Girl送蛋糕！」。

而陳炳銓就感激劇組為佢留下難忘的生日：「個場戲講緊我要燒衣，燒燒吓就見到Sofiee捧個蛋糕出黎，其實都真係嚇一嚇！好多謝大家精心安排，真係好難忘！（同女友點慶祝？）佢都要開工，遲啲食餐飯啦。（大個仔諗結婚未？）唔講啦呢啲，順其自然啦！」。