[K韓公社]那些年我遇過的韓星 ——  GOT 7

最近真係好多韓星黎香港唔係開CONCERT就開FAN MEET,各位粉絲係咪又準備好賣腎喇!?而黎緊7月第一個打頭陣既,就係有香港成員Jackson既GOT 7啦!等左一年,佢地又要黎香港見鳥寶寶們,真係有心!有見及此,想同大家一齊重溫下佢地上年演唱會既片段! 

而2016年係佢地第一次巡到黎香港,直到而家aki都好記憶猶新!因為真係睇到佢地落左好多心機!唔知有去既韓煬們,你地仲記唔記得,佢地拍既搞笑片,係由韓國搞笑藝人李國柱要train佢地做女團,教佢地跳sexy dance、擺post、表情等等,真係笑到停唔到!個段片真係十分不得了!之後,佢地出黎大跳個期hit爆既 GFRIEND同RED VELET,個女裝扮相真係好「難忘」XD…… 

而講到aki最深刻既一個moment,就係佢地出黎唱BEYOND「喜歡你」既時候,Jackson講既一席話,佢話:「好多謝你地咁忙都抽空黎呢個演唱會,可能有啲人聽日都要反工,真係辛苦哂你地!同埋希望你地會睇得開心,因為知道你地反工受左好多苦好多委屈好多氣好唔開心!個啲人點話你點睇你都好!唔緊要架!唔使理佢地架!你做好你自己就得!其他人要點講有得佢!有咩唔開心,係呢到發洩哂出黎!希望你地成日都開開心心!」

aki到而家都仲記得好清楚,因為小妹忍唔住喊左…..因為個時既工作真係受左好多不必要既委屈,甚至被公司完全無理由地解僱,jackson呢一番話個刻完全中左小妹既心底裡! 而身邊既同事都一齊忍唔住……

事隔差唔多一年,佢地又再反黎香港開CON,唔知到時又會有啲咩難忘回憶呢?

2017年7月1日晚上7點正,係亞洲博覽館見啦,鳥寶寶們!!