[K韓旅行社] —– IL Piatto

各位哈韓國民們~通常你地去到鄉下朝聖既時候,仲係咪拎住本旅遊書?定係上網搵邊間熱門食店或景點呢?當然韓劇或節目拍攝地就必然要朝架啦!但小妹已無拎書好幾年,因為最愛既反而係無意間發現某店、某地、某美食既美好!個種開心發現既感覺,係真係好難忘,亦每每都會成為你下一次出發既原動力。 

aki我某次「回鄉探親」,有位我最親的韓國妹妹話想請我到佢打工既店到食飯,我覺得又幾得意,當然二話不說就OK啦!氬妹妹仲期待又緊張過我,真係好鬼可愛呀~

約左佢接近黃昏時間等,呢個時間既新沙洞真係好靚,再加上10月呢啲秋涼時份,真係舒服到呢~跟住佢既腳步行過左林蔭大道,越過左兩條激斜既大斜路!真係企唔穩小小都「碌」落去,妹妹都一路叮囑要小心慢慢行,因為佢都跌唔小,特別冬天時XD再上左兩層樓梯….一把年紀既aki真係喘哂氣,如果無人帶都真係唔識黎呢到,都幾隱蔽架!但係個環境又好寫意!

終於黎到店門口,一睇之下先知原來係意大利餐廳!又真係幾新鮮,黎韓國唔一定要食韓餐既~我地陪住佢開舖,一開門我就見到有部鋼琴、鮮黃色既歐陸式牆壁、仲有結他、簽名「碟」等等,成件事都好歐洲!而妹妹係到忙碌緊既時候,我就自己走左去玩琴,等待傳說中佢話好好老闆娘。玩左十分鍾左右,佢終於出現啦!真係好慈祥既臉孔,一見到我地就立刻露出笑容,妹妹就幫忙介紹,原來佢話成日聽佢提起我,所以當妹妹一話佢知我會黎韓國,佢就叫妹妹帶我黎,聽到我真係好鬼感動! 

跟住妹妹就拎左餐牌黎比我地揀,其實唔係太多選擇,主打三款皇牌既pizza同四款左右既pasta,同幾款意式小食,真係正宗小而精!由於食得太多肉既關係,我地就揀左款田園沙拉pizza同埋卡邦尼pasta,扮下一日清淡。 當我地見到個pizza既時候都好驚訝,真係咁「綠」既?以為中伏,點知個秘制醬汁至係重點,真係成件事反哂黎!以為得啲草唔會有咩味,但個醬汁加埋係真係好好食!食素既真係好岩key,當然有肉既pizza啦,大家放心!而個卡邦尼意粉真係好味到癲!佢真係同以往我地食既有分別,特別係個意大利面條,真係好正宗!跟住老闆娘仲特登整左個小食比我地食!真心未見過,名都未聽過,只記得係甜!好似蘋果批咁(?!)….總之又係好好食啦!!同埋真係即叫即整,所以係會耐小小架~~但都好值! 

老闆娘整好哂野,就出左黎同我地傾計,當然第一句就係問好唔好食啦~個答案唔使我講啦掛!跟住就想了解下佢多啲,原來佢去過意大利學藝6年,仲講得一口流利意大利文,真係好鬼羨慕!當然佢都禮尚往來讚下小妹既韓文咁啦~一路傾一路翻譯下比同行朋友同佢媽媽聽,傾傾下就講到感情問題….由於aki一向都係單身狗,老闆娘表示十分震驚,就叫我地即刻落club玩,仲等咩!我地都靜左一靜,果然外國留過學既真係開放啲~XD

搞到我都唔知翻唔翻埋比阿伯有聽好,佢仲話而家唔去等幾時,韓國既CLUB好安全,搵仔仔係要點點點…..真係好鬼活潑!呢位老闆娘阿姨,係咁教我地點溝OPPA,我地好留心聽書架!傾傾下有兩個韓男小鮮肉入黎幫襯,阿姨即叫我地去馬!我地感覺到兩位弟弟好不安XD….

後來發現其實好多節目,仲有網劇都係到取過景!最後,老闆娘一蚊都唔收,請我地食左呢餐~真係好窩心~~~大家下次去韓國不妨都拜訪下呢間咁溫暖既意菜餐廳—–IL Piatto啦!