高潮黃建東 vs 3000呎林作

2017-03-09 浩楠

憑惡搞PPAP而為人熟悉的無綫藝人黃建東 (阿東) 近日又有新攪作，今次找來前大狀林作一齊玩：「早前在晩宴認識了林作好傾得埋，大家想一齊合作拍片。我第一個構想就是想改變他的髮型和形象，剛巧最近《有樓萬事足》的高潮女 seasun熱爆，而她又講過有2000呎屋才有高潮，剛巧林作又有3000呎大宅，所以度了一個高潮東遇上3000呎林作的故事，我另外扭轉了高潮女凡聽到3就有高潮。」

今次阿東特地帶備私伙衫、飾物和髮型用品為林作大改造：「我想佢着得rock啲，所以我去佢衣櫃度睇下佢有啲乜嘢唔同嘅衫，結果裏面清一色西裝和紳士外套，所以我要帶自己的皮褸和飾物。最初我嘗試幫佢set頭，但係佢嘅頭髮實在太厚太難搞，所以最後交俾髮型師負責。最後我為林作打造了一個韓星造型，仲化了個煙燻眼妝。」
問到林作今次對拍攝和改變形象有何感受，他十分喜歡新形象，還說一直很留意黃建東的作品：「我覺得佢好似港版波叔 (Sachs Baron Cohen)，好有幽默感和創意，不停度橋又約我出嚟詳談，非常有心機和熱誠，所以無論他想怎樣做我都願意配合。由早拍到晚上我人都散，但阿東仍然精力充沛不停調整拍攝，非常犀利。」
今次阿東特地擠出 5寸事業線、著黑絲和黐了假下巴，還改了個名叫Threesome同埋不停高潮，大放笑彈。今次阿東對林作表現大為滿意，覺得他非常專業和有耐性，而且很感激他願意借出豪宅拍攝，以及他和林媽媽的熱情招待，我們拍最後一場整蛋糕整到成個廚房污糟晒都毫無投訴，非常感動。