雷晴雯首度剖白當年急退悲劇內情 母病情被出賣連番自殺痛曰無得揀

藝人雷晴雯 Winnie日前接受網台「娛樂程報」直播訪問，主持Milla程芷渝問到Winnie當年為何離開娛樂圈時，Winnie於鏡頭前首度開腔剖白，原來當日她匆匆離開娛樂圈背後存在著一件不為人知的悲痛慘劇。Winnie於節目中表示，當年她雖被不斷追訪，卻從未想過牽連家人，但偏偏因自己緣故導致其患有嚴重情緒病的母親隱私被揭，病情突然被公開兼大肆報導，其母因此大受刺激，病情瞬間惡化，崩潰失控更多番試圖跳樓，節目中Winnie苦笑表示：「阿媽得一個！當時根本無得揀！」連主持經驗豐富的Milla聽罷也錯愕得無法言語，並慨嘆「人言可畏」。

記者及後聯絡上Winnie，問她為何當初不把實情公佈，反而背負如此沉重的秘密達廿年之久，卻換來Winnie一次又一次深深的嘆氣：「宜家我敢講，係因為媽子同公公都已經返咗天家，唔會再對佢地做成傷害。當年發生咁多事，我全部都只係同公司內部同事講過，我媽嘅病情都只係喺世界杯總決賽當晚因顧及媽子病情經已有變，我唔想再接受任何記者訪問，所以先喺一廠梳化辦公室閂埋門向外事部嘅同事私底下解釋過一次而已，更千叮萬囑該同事絕對不能俾記者知，否則我媽會出事！但結果第二朝所有報紙出晒我都未知，直至媽子睇到篇報導，我親眼睇住佢突然發咗癲咁衝入廚房攞把菜刀出嚟狂斬份報紙又話要斬死記者，嗰陣我先知我又俾公司出賣多一次！或者佢哋認為外事部透露俾記者知係天經地義，所以根本無諗過將我媽病情保密，但就係因為佢哋不分輕重不理後果嘅行為，我好幾次差啲就要幫我媽子收屍！」

有傳無線當年因Winnie行為怪異行蹤飄忽，甚至有傳她曾與藝員科高層吵大鑊，以致被雪藏且被下令永不錄用，就此事向Winnie求證，Winnie無奈回應：「電波少女期間的確曾經被藝員科高層急召返公司照肺，理由係我唔願意配合記者，唔肯做訪問，有劇唔肯接，宣傳唔肯出席，連慶功宴都要早退。該高層話公司本來打算想力捧我，但我樣樣都唔合作，俾人印象神神化化，佢話如果我再係咁公司好難再俾機會我。但其實嗰段時間我媽已經因為當日外事部以佢嘅病情『大肆宣傳』而嚴重惡化到等同唔知幾時突然會爆嘅計時炸彈，當時我已深知為媽子病情著想我無可能再繼續留喺娛樂圈，加上因為覺得自己信錯外事部先會令媽子病情一下子壞得不可收拾，內疚、自責、擔憂、徬徨、恐懼，加上四面八方而來嘅各種壓力，連我自己情緒亦出現問題瀕臨崩潰邊緣，去到如斯田地自然藝員科講到天花龍鳳我都唔會答應。所以最終下埸咪就係大家所知道嘅，我先被雪藏乜都無得拍，同時被下令『永久Lock死』永不錄用，喺雪房住到合約完晒為止囉！不過咁樣對我而言反而係一件好事，起碼我可以 24 小時睇實媽子，以防佢自殘或又做傻事。住喺雪房，無工開，無新聞，唔再見報，我亦改晒中英文名，剪短頭髮、換埋老土小雲眼鏡，將生活慢慢轉向平靜，結果足足用咗接近一年時間，我媽嘅病情先開始漸漸緩和返。」

問Winnie如今復出難免會被過去與無線鬧得不愉快的形象牽連以致舉步維艱，她可有後悔當日決定，她卻斬釘截鐵表示絕不後悔！「要我離開幕前唔可以再演戲當然會非常唔捨得，但媽子永遠只得一個，佢條命同健康先係最重要，根本唔使諗亦唔使揀，媽子永遠排首位乜都無得比！」

Winnie於Milla的訪問中表示現在沒有了家人的考量，希望能為自己好好的活一次，2017年最大願望是做回一個好演員，有機會演上一部好戲。除此之外，原來Winnie亦有另一個心願，向來積極參與慈善活動的她希望能為情緒病患者多出一分力：「我與亡母都是過來人，深深體會當中的被漠視、被誤解、被歧視及不被接納，所以更要積極推動正向知識，讓更多人明白如何以正確的態度去面對、接納、了解及正視情緒病這個現今社會的普遍問題。」