蘇志威@草蜢50歲生日會 葛民輝、張衛健拍祝賀片送驚喜

今天是草蜢成員蘇志威(蘇老闆)50歲生日，昨日他提早與100位歌迷開戶外Party慶祝。老友蔡一智帶埋老婆仔囡參加，齊齊與歌迷玩遊戲。歌迷邀請他的父母、好友葛民輝、張衛健和星級Fans容祖兒等拍祝賀片送驚喜，而大女Yumi更花了9個小時親手炮製蛋糕，並與妹妹Ina送吻，蘇老闆勁冧！

記者:法拉利

雖然草蜢近日馬不停蹄為相隔19年再推出的國語專輯《Music Walker》而四出宣傳，但蘇老闆希望答謝歌迷們對草蜢多年來的支持,決定提前在香港慶祝。

令蘇老闆感到驚喜是歌迷特別邀請他的朋友拍片送上祝福，其中葛民輝和張衛健最搞笑，阿葛大爆草蜢初出道時同居九龍城的時候，蘇老闆經常只著底褲周屋走，所以一直都覺得他特別「威猛」和「硬朗」，又笑言要叮囑他：「喂，你年過半百架，著返條褲啦，啲女都大個，唔好再吊吊揈！」而張衛健就窒吓窒咁唱生日歌，他說：「呢首chok版生日歌特別送畀蘇老闆，祝你身體健康，年過半百，有心有力。祝你黃雨點淋都唔病，馬拉松跑極都唔冧。阿嫂，畀啲3鞭酒你老公補吓，擔保佢鞭鞭有力，生日快樂！」他七情上面又手舞足蹈，全場爆笑。
歌迷有心思，蘇老闆亦專程在台灣帶了10張專輯海報、蔡一智設計的頭巾等做禮物，由於禮物非常珍貴，歌迷玩遊戲時都份外落力。

玩遊戲期間，蘇老闆透露早前他暈倒馬拉松賽事時，得到一位陌生人悉心照料，因為對方替他聯絡蔡一智，所以蘇老闆日前專登打電話問蔡一智取回對方聯絡，並請對方食飯答謝。

生日會重頭戲當然是唱生日歌和切蛋糕，蘇老闆兩位囡囡上台獻花和咀嘴，還有太太劉小慧隔空Kiss，非常溫馨。之後蘇老闆感性地說：「我真係好開心，今日嚟咗好多跟咗我好多年既歌迷，仲有阿智一家大細，希望每一次聚會都可以見到呢班熟悉既臉孔。好多謝歌迷搵咗好多我身邊既人拍片送畀我，祖兒、阿葛(葛民輝)和Dicky(張衛健)，就連我平時去打波既桌球室和車房老闆都有，最勁係搵埋我爸爸媽媽拍片。(生日願望?)希望大家都身體健康，開心快樂。仲要多謝Yumi花咗9小時造咗個蛋糕畀我，我唔捨得食！」