莊思敏珠海耐力賽 賽足90分鐘 得梗頸四

莊思敏(Jacquelin)日前在珠海國際賽車場，首次參加「賽道英雄─珠海500公里耐力賽」，當日原定賽車時間共3小時，由三位車手接力，每人賽車一個鐘，豈料Jacquelin抵賽場後，才被知會其中一位隊友甩底，令到她臨時臨急「OT」，要和另一位隊友各自賽車1.5小時。

今次Jacquelin獲Grid Motorsport贊助參賽，以首次參加耐力賽以言，其成績不錯，她說：「算合格啦，喺第一次冇經驗情況下都安全完成已經係我目標，喺我地組別入面排第四。全個賽事共有44架車，我哋係20位，排名喺頭一半已經好安慰、好滿意，我希望盡快參加同類型比賽，因為呢個耐力係會上癮。」

提起隊友放飛機，Jacquelin亦相當無奈，「我到珠海嘅時候，先知其中一個partner放飛機，唔聽電話消失咗，我哋兩個車手就要完成晒三小時嘅比賽，結果係緊張到冇食lunch。我第一次參加耐力賽，喺體能上應唔應付到都已經有啲擔心，隊友甩底就唯有頂硬上。」

Jacquelin表示參加耐力賽除了鬥快外，壓力亦唔惹少。平日賽車，她一人獨駕自負責任，但有拍檔的話，如果自己有些少出錯都會輸時間累街坊，所以這賽事全然是另一種訓練，「專注係好緊要，因為每個圈都希望做到最好成績，同埋又會訓練到耐力同堅持，其實喺個半鐘內不停咁高速駕駛係非常之攰，但因為唔想將壓力俾隊友，所以會堅持，但賽完之後就成個人散晒。」