雨僑挑戰自己 跑完10K再戰半馬

弱質纖纖、早前擔正《猛龍特囧》女一的雨僑，近兩個月忽然收埋，原來一直秘密練兵，開闢人生未涉足的運動功能界別──跑步。

下月20日，雨僑將會參加香港半馬拉松錦標賽，在跑道上首次進擊半馬賽事，所以最近她每周都抽出至少兩日時間跟教練跑步，還持之而恆艱苦受訓。

她說：「咁多年嚟，基本上我係一個零運動嘅女仔，今年突然參加跑步賽事，係想趁自己仲有幹勁同有精力嘅時候，去試一啲從來冇做過嘅嘢，俾自己多啲挑戰，亦係一種好好嘅體驗。」雨僑以為跑步好易，到受訓時才知有幾痛苦，好幾次都辛苦都喊，為免曬黑搽防曬油，結果出唔到汗焗到病，雙腳又攰到幾乎斷，但她咬住牙關堅持，結果早前她參加於天水圍濕地公園舉行的香港十公里挑戰賽，以1小時20分鐘跑晒全程成功過關。

憶述當日順利完成10K賽，雨僑亦大為感動，「嗰日過咗8K之後，我對腳已經感覺到抽筋同埋好痛，不過唔敢停，因為一停低就跑唔到返嚟，到跑完嗰刻真係散晒，完全想像唔到自己可以跑到相當於由荃灣跑到旺角嘅10K，我竟然真係做到，簡直不可思議，好鼓舞！嚟緊嘅半馬當然係更大挑戰，我都會盡力而為。」