[電影] 姚樂怡陀B八個月 為《十月初五的月光》拍特輯

經典歸來的《十月初五的月光》電影版今晚將假銅鑼灣時代廣場舉行盛大首映禮，並於後日(12日)在港澳星馬四地同步上畫，本月20日則全國上映。

一直與觀眾繫着15年情意結的一班「澳門街坊」，除了「初哥哥」張智霖(Chilam)、「君好」佘詩曼、「Q姨」薛家燕和「金勝」唐文龍等等，逢周末狂煲《十》劇的觀眾，一定記得港女味濃的「金勝」女友「依文」姚樂怡。雖然觀眾無緣在電影版見依文，但其實現時懷有8個月身孕的姚樂怡，已連人帶B靜雞雞拍了一連三集的《十》片製作特輯，其公關公司亦於日前舉辦新港城中心的電影宣傳活動，可見她有幾撐好姊妹阿佘和Chilam。

其實樂怡一早被邀拍電影版，但當時她剛懷孕，所以婉拒拍攝，她說：「嗰時監製搵我，我有咗幾個月又未穩定，個人好唔舒服，行兩步都攰，行條樓梯都好喘氣，已經要搵地方坐，仲要搭船過澳門，仲唔嘔到飛起？所以推咗冇拍。」

雖然拍不成電影版，但樂怡亦拍了三集製作特輯，在三齣片中她都是以「依文」身份出現，分別致電問候「初哥哥」、「Q姨」和「君好」，從而帶出角色在15年後的變化，當中「依文」問「初哥哥」：「其實『君好』都同『禮信』(馬浚偉飾)結咗婚咁耐啦，你係咪仲係放唔低呀？」「初哥哥」聞言即刻眼紅紅鼻紅紅，睇到fans心都痛；

在另一集中，「君好」又對「依文」說：「你話時間可以倒流，幾好呢，好似以前咁，你、我、『初哥哥，仲有『金勝』，大家喺埋一齊，幾開心…」「君好」的憂愁也令人黯然。

樂怡在拍攝當日，湊巧偶遇「金勝」唐文龍，兩人馬上合照留念，樂怡說：「嗰日見番『金勝』，自己真係對套劇有feel，我哋影咗張相，張相放咗喺微博，啲fans好笑架，留言話個肚係你同『金勝』幾好呢，哈哈。」在商場活動當日，她再見澳門老街坊少不免又影相sharing，「嗰日現場一播《祝君好》首歌，望上台見返班『澳門街坊』，真係有少少感動，因為當年呢套劇好經典，首歌係襯呢套劇襯到絕，所以即刻有感覺。我發覺啲fans真係好鍾意《十月初五的月光》，佢哋可以講返晒啲劇情，同埋佢哋好想『金勝』同『依文』喺埋一齊，佢兩個喺電視劇入面冇happy ending，fans覺得好唔抵，同埋電影版又唔可以再一齊，證明呢套戲俾人好深刻，既經典又原班人馬，只係當時我啱啱有咗點拍吖，所以拍唔到電影版都好唔捨得，但有得拍製作特輯都叫有份參與咗，都好開心啦，希望電影版快啲開續集啦。」