胡杏兒米蘭掛住睇Fashion騷 無食飯

胡杏兒日前獲得騰訊時尚邀請，專程飛去意大利的米蘭時裝周。這次是杏兒首度踏上歐洲時尚之旅，並應邀換了多套最新時裝，令人充分認識到她對時尚的駕馭能力，變身時尚icon。

期間杏兒穿上UMA WANG 2015秋冬系列的雙色連身裙，現身米蘭街頭的她寬寬裙子隨風擺動，十分飄逸；她示範的另一套PORTS 1961最新春夏裝，以簡單又classic的黑白配色及簡約剪裁，清爽帥氣，品牌設計師大讚杏兒着得靚，更和她合照留念。

不過因為工作關係，杏兒只在米蘭匆匆逗留48小時，所以她全程chur盡，盡量爭取時間睇騷，先後睇過HOGAN、UMA WANG、ETRO及Philosophy的時裝騷，杏兒說：「我去咗兩日米蘭，今次係我第一次去米蘭時裝周，去咗幾個品牌嘅時裝騷，亦有去後台見一啲設計師，包括PORTS 1961、UMA WANG，覺得大開眼界，因為自己都好鍾意fashion嘅嘢；同埋米蘭嘅時裝氣氛好濃，雖然要一個騷趕一個騷好緊密，係緊密到連飯都冇得食，由lunch到dinner都冇食。」

冇啖好食之餘，杏兒連出血時間都冇，「冇得行街啦，係第二晚完咗騷去咗間百貨公司行咗45分鐘咋，好慘呀！不過我覺得成個trip係好熱鬧同好玩嘅，希望下次有機會再嚟fashion week時，時間可以充裕啲啦。」