王宗堯執導 為陳詩慧拍《i’ll be there》MV

王宗堯(Greg)自從開設製作室後計劃多多，雖然之前他曾為Mr.的mv提供意見，但未算是一個真正的工作項目，近日Greg正式開齋首次執導，助同公司的唱作歌手兼老友陳詩慧(Eva)的作品《i’ll be there》中文版《東角駅》出任mv導演。

昨日Greg和Eva在銅鑼灣開工拍mv，兩人各自擸了一件架生：Greg揸機、Eva孭結他，齊齊由天光拍到天黑，又由維園草地拍到去東角駅，所以他們連食飯都是買外賣在街頭開餐，Greg更全程機不離身，貼住Eva行到邊影到邊。

昨午Eva在維園拍攝時遇老外jam歌，到晚上她移師東角駅自彈自唱拍攝期間，有名阿叔以為她賣唱，竟然掏了$4.1放在她的結他盒內，非常搞笑，事後Eva笑說：「其實我唔係賣唱係拍嘢，不過都幾得意，拍拍吓真係有人以為我賣唱，俾咗$4.1，我會鑲起嗰$4.1，同埋我想感謝嗰位叔叔，佢俾錢我嗰刻我唔知好笑定好嬲。」之後在場的工作人員也跟Eva開玩笑，紛紛放錢「捐獻」。

為Eva兩脇插刀的Greg則說：「好開心有呢個咁有意義嘅project幫陳詩慧，呢個算係我自己公司嘅第一個project，我哋兩個結緣於《選戰》，今次係佢喺我哋公司第一張發行嘅CD入面嘅主打歌，亦係《i’ll be there》嘅中文版，所以我就幫佢操刀，特登揀番銅鑼灣嘅東角駅拍，同埋會拍番銅鑼灣嘅景，仲有啲特別人物友情客串喺佢個mv出現，希望mv出時大家番意吓我哋嘅用心。」