雨僑為電影《猛龍特囧》視覺效果 啪藥戴遠視鏡

暑假壓軸爆笑猛片《猛龍特囧》已鐵定於本月27日隆重上映，這部戲除了有向來搞笑的鄭中基(Ronald)主演外，今次自編自導自演的胡耀輝(Mark)和女主角雨僑(Ava)亦有破格演繹，兩人在片中扮演一對非常錯配的兄妹「孟子良」及「孟子君」，Mark唔靚仔但硬要做明星，明明靚女的Ava卻要扮大近視傻大姐，鬧出笑話成籮。

《猛》片其中一幕戲講述孟子良由孟子君陪同下約見電影人田啟文試鏡，爭取拍《變形金剛》的機會，希望升呢國際巨星，該場戲Ava同樣以大近視造型示人，她笑說：「一路以嚟副眼鏡都係致命傷，其實導演、服裝、工作人員都建議不如戴平光鏡，但我覺得戴遠視鏡放到隻眼好大，效果會好笑啲，所以就算食暈派丸都堅持戴嗰副，但暈浪丸六個鐘會散，所以藥接藥好似道友咁，一唔記得食藥我就開始暈。」幸好導演亦安排Ava靚番場，穿着白婚紗出鏡，Ava笑說：「對於唯一場婚紗戲係珍而重之，亦好盡力去做，但嗰場戲又係喊，成套《猛龍特囧》人哋拍喜劇，我就好似悲劇咁，由頭喊到尾，因為呢個女仔好簡單，個角色好容易喊，開心又喊，危險又喊，所以拍呢套戲要飲多啲水，如果唔係拍到頭都痛。」

Mark對於和Ava扮錯配兄妹則說：「我覺得世事就係充滿『錯配』：Ava靚女戲中冇得靚，『孟子良』可能有才華，但生成咁嘅樣想做明星…不過，我相信成功要有實力、努力之外，運氣的確好重要。孟子良呢個發明星夢嘅小人物最後可唔可以紅、孟子君着完婚紗之後係咪真係變返靚女？當然要入場睇先知。」