300巴打絲打 優先入場睇《壹獄》

改篇自高登神作三部曲壓軸篇的人氣話題猛片《壹獄壹世界‧高登闊少踎監日記》，已鐵定下周四(28日)隆重推出。《壹》片誕生於高登世界，中國3D數碼娛樂上周六(16日)在九龍灣星影匯舉行了高登優先場，由原作者小姓奴率逾300名高登巴絲入場睇戲，到場演員包括王宗堯、張建聲、黃光亮、姜皓文、崔碧珈、林芊妤(Coffee)、張松枝和周祉君。完場時，一眾演員和小姓奴、導演孫立基及編劇沈錫然齊齊上台與巴絲開心share，張建聲搞笑地指高登的用戶名好有趣，大叫署名「張美妮唔扯旗」、「x你個大老尾」、「登高小毒女」現身，令現場巴絲笑爆。

今次高登優先場是史上第一次，向來神秘又引領香港新文化潮流的高登巴絲極罕露真身，更難得的是在完場後，巴絲在戲院大堂自動匯集成多條人龍排隊等和演員合照，自律兼秩序井然，令演員不停滾動感動。

黃光亮一出戲院大堂已說：「我條龍嚟呢度！」排隊影相的巴絲打晒蛇餅，場面偉大，光哥猛說：我從影以嚟從未試過，簡直感動呀。」王宗堯的男神效應、張建聲的積哥霸氣、Coffee的nice等等也對巴絲非常誘惑，合照、selfie絡繹不絕，氣氛熱鬧；更難得的是之後巴絲在高登開po評價《壹獄》，正評連連，小姓奴更以神蹟比喻，「其實高登仔有一種咩都會x的文化，好鍾意x，即使《復仇者聯盟2》咁，佢哋都好多不滿；但我上番高登睇番佢哋嘅觀後感，全部都係正評言論，我覺得係一件神蹟！完場後我上台感受好深，3年前我每晚將800至1,000字放上網畀各位巴打睇，今日係兩個鐘頭內俾佢哋重溫番呢兩、三年嘅回憶，今日呢間戲院就好似一個實體版嘅高登討論區咁，真係好感動。」

王宗堯則說：「高登仔係第一批我睇到嘅觀眾反應，係我最想睇嘅。我上過佢哋forum睇，佢哋對於蕭生拍嘅高登網絡小說有啲反感，佢哋成日因為某啲事情覺得蕭生唔代表佢哋，但其實我想話俾佢哋聽，我哋公司一路都想拍好高登嘅高登電影，今次睇到佢哋嘅反應係好值得鼓勵。呢套戲令我哋好自豪，因為我哋公司有一套至到目前為止係我認為係最實淨、好好睇、而且每個演員都做得好好嘅戲。」

張建聲說：「今日見到好多高登巴打之後，我發覺天外有天，人外有人，佢哋嘅user name同真人好不同，男女都有好大分別，睇到佢哋反應非常熱烈，戲入面嘅笑位，甚至乎血腥位，大家都好有共鳴。」大受巴絲歡迎、影相影唔停的黃光亮亦說：「好感動，咁大個仔未試過，呢個機會好難得，我都出奇，總之有條龍跟住我。今日睇戲嘅感覺係我唔當佢係觀眾，當係大家一齊做嘅電影。」