C AllStar鬧市扮喪屍 拍《上車咒》MV

C AllStar四子穿梭中環、銅鑼灣和深水埗等港九7個鬧市，分別在10條人來人旺的馬路上慢速橫過、在繁忙的行人路跳道士舞散紅紙、在地產鋪門外喪屍一樣狂抓玻璃櫥窗，最玩嘢是他們的額頭上都貼了一道黃色疑似符咒，仲周街散溪錢，發癲一樣的C AllStar全為新歌《上車咒》拍攝MV。

新歌《上車咒》由C AllStar的成員陳健安(安仔)一手包辦作曲和詞，歌詞寫盡香港人窮一生搏命搵錢只為安居樂業，反映為「上車」的辛酸史，早前搶先網上登場的歌詞版MV，無限Loop「買樓買車買樓買車買樓買車」歌詞掀起網友熱話，引起共鳴。日前C AllStar拍攝真人版MV，由中環、銅鑼灣、跑馬地、北角、美孚、深水埗到將軍澳等住宅區取景，額頭貼住黃色「上車咒」符咒，表情肅穆，整齊劃一的慢動作舞步橫過馬路。又在人群中跳「道士舞」作法，甚至周街散溪錢動作，雖然散的只是道具圖畫紙，亦難免要講句「啋，大吉利是」，好彩導演嗌cut機四子立即「回魂」執錢，否則仲要被罰千五，逐張計都幾和味! 不過他們最譜是貼住符咒去茶餐廳開餐，食客百無禁忌，還大一位婆婆搞笑叫他們要好似殭屍跳，彈吓彈吓跳才是「正宗」，婆婆可能是「殭屍先生」的忠粉。

包辦作曲和詞的安仔感歎，說：「呢個世代上車真係好難，我哋四個都有排未上到車，好想紀錄呢個咁艱難既日子，寫出大家既心聲，要博晒命，做到病仲要借錢先至可能上到車。」他還解說這首歌最初是《上車「奏」》後來覺得「咒」字更適合。Jase說：「我哋扮喪屍，就好似為買樓搞到啲人好似行屍走肉咁，無晒靈魂，只係識搏命搵錢。剛才在中環跳舞既時候，有個婆婆仲叫我跳吓跳吓先似，我諗佢以為我哋拍殭屍片。」

C AllStar四子之中，誰人最早「上車」呢?他們異口同聲指King最有潛質，釗鋒說：「我哋四個之中，King第一個人搬出嚟獨居，佢似乎最有可能『上車』!」King耍手擰頭，釗鋒續說：「不如我哋四個一齊買樓『上車』，一齊住啦!」King立即搶答：「唔得!」事關他最愛整潔，難怪不肯與另外3個麻甩仔合住。