《壹獄壹世界》張建聲出冊 女囚犯馬嘉韻Mars 棒踎7日

張建聲 (Justin) 為宣傳主演改篇自高登神作最終章的《壹獄壹世界：高登闊少踎監日記》，親自走入流動「水飯房」，實況體驗踎監生活。今日(4日)，穿上囚衣的Justin踎足72小時後終於在銅鑼灣出冊，同片演員張松枝、趙永洪、周祉君，以及公司師妹唐貝詩和老闆蕭定一齊到場迎接Justin光復自由，更安排他檻火盆，又用碌柚葉為他掃身趕衰氣。

隨着張建聲出冊，電影公司已從數以百計的云云參賽者中選出19歲0靚模馬嘉韻 (Mars) 接力。馬嘉韻表示自己雖然擔心出現崩潰狀況，但希望堅持捱到至少三日，而且今次坐監絕對是種人生體驗；由於女參賽者備受注目，加上她穿短褲露出大腿紋身，所以現場亦吸引大批途人駐足圍觀。

出冊的張建聲滿面鬚渣，亦比前略為清減，在場的趙永洪還笑他這幾天不知如何解決性慾，張建聲則笑說：「我冥想啫，講真，我仲邊有力去做吖？我仲可以冥想諗到嘢已經係一個奇蹟。最辛苦係第二日，個人有啲崩潰，出現踱步，同埋壓力愈來愈近，出現幻覺，仲有少少幻聽，原來係會困癲一個人，千祈唔好輕視。」他出監後會休息兩天，再注意一下自己的精神狀態，「因為有啲朋友嚟探我，話我眼神變變哋，好似唔識眨眼咁，我都好驚，咁大個仔都未試過面對精神創傷。」

唐貝詩對於今日能見證Justin放監感到開心，她說：「但佢個樣好滄桑，幾日都冇剃鬚，我睇到接力個女仔Mars嘅報道，知道佢係一個model，收入唔穩定，佢希望捱到七日攞兩萬交租，我好respect，始終一個女仔得19歲，喺街度俾人望又俾閉路電視拍住，希望佢可以體驗生活之餘，可以提升知名度有更多工作，加油！」

「實況體驗踎監有錢派」今日才正式開始，但連日來報名反應非常熱烈，蕭定一透露比賽會一直接力至六月一日，亦計劃將遊戲「加大」，於西九龍中心加建一個監倉，讓更多參賽者有機會玩遊戲贏獎金。蕭定一又笑說，會加人工給Justin作為獎勵，「男人好難安撫，加人工啦，最實際，俾獎金，如果呢部戲成功佢功不可沒，因為佢付出好大。」

此外，為令今次坐監真人騷具更佳效果，電影公司已重新裝置高質器材，讓網民可上網看到高清直播畫面。