《側田WeTouch Live2015世界巡迴演唱會》6月5-6日舉行

靚聲創作歌手側田將於今年6月5、6日，於紅館舉行一連兩場《側田WeTouch Live2015世界巡迴演唱會》。為配合演唱會「WeTouch」主題，特別安排一位女模與側田齊齊影海報，被6呎女模的42吋長腿纏住，甚至被胸壓的側田，艷福無邊，這個羊年肯定桃花大旺！

過往側田演唱會海報都只得他一個人，今年將會是他第5次踏紅館舉行個唱，終於擺脫孤獨宿命，為配合「WeTouch Live2015」主題，大會安排了一位6呎女模與他一齊拍攝演唱會海報。雖然女模非常神秘，全程只見手腳不見樣，但穿著黑色透視裝的她，事業線若隱若現。甫埋位，她就在側田身後「腿張開」，以42吋黑絲長腿搭住他的膊頭，仿如騎膊馬的甫士，為擺靚甫士，她的右腳「斗零踭」就在側田兩腿之間篤來篤去，最後「降落」在側田的大髀上，實在替「小側田」擔心！

而另一款甫士，攝影師要求女模從後雙手攬實側田頭部，一擁入懷，而他就配合「touch」主題摸摸女模手臂，女模坐得不穩，整個上身都要挨住側田借力，兩人幾乎「零距離」，而側田目不斜視亦不敢亂郁動，以免頭頂「警鐘」！

側田自爆對長腿情有獨鍾，他笑說:「今日女Model真係好高，我喺隔離好似個細路仔，最緊要效果靚! 人哋話男人對女人既喜好，隨住自己年紀，越老越向下走，細個鍾意睇樣，老咗鍾意睇腳，但我好早就鍾意欣賞女仔既腳，我比較早熟，哈哈！」以往拍海報都是只有自己一個人，今次不但有人陪，而且與女模不少身體接觸，艷福不淺，他說:「今次演唱會主題係『WeTouch』，所以要多啲touching，其實人與人之間應該多啲掂吓對方，掂下你愛既人，唔好淨係掂住自己部手機。我好多時同一班朋友食飯，都唔准大家玩手機，要專心傾偈，要有眼神接觸。」側田更揚言要求自己個唱上，所有觀眾放下手機，專心欣賞他的演出，他說:「雖然我知咁既要求好難，但真心希望演唱會3個小時觀眾都唔好開電話，唔好再透過螢光幕睇演唱會，好好享受Live Show！」

穿著西裝拍海報的側田自言很少正經打扮，他笑言連說話都變得斯文，據悉側田近日秘密操肌，是否會在個唱騷人魚線和朱古力腹肌?他大賣關子，說:「操少少啦，總之到時一定會OK！」