「Touch Mi鄭秀文世界巡迴演唱會」 「奶媽」Wyman任第2場嘉賓 (附圖輯)

「Touch Mi鄭秀文世界巡迴演唱會」合共12場跨年演唱會，昨晚(12月21日)假紅館舉行第二場演唱會，全場爆滿，闊別紅館舞台5年的鄭秀文（Sammi）施展渾身解數，十多款精彩造型一個接一個亮相，令觀眾目不暇給。

昨晚Twins阿Sa(蔡卓妍)前來捧場在VIP席又唱又跳，非常投入。而台上的特別嘉賓黃偉文(Wyman)，穿上TEX SAVERIO的Sammi唱《輸得漂亮》時，從舞台特別效果設計的「紅地毡」迎接Wyman出場，手拖手和擁抱，之後Wyman笑說：「多謝Sammi介紹我出場，否則啲人以為阮兆祥做嘉賓!」全場爆笑，他又笑指Sammi以前人際關係差，所以來來去去都只是由他做嘉賓，說：「不過依家唔同即，交遊廣濶，所以話另一半幾重要呢，成個人變晒!」台下觀眾報以掌聲還大叫「安仔」(許志安)，Sammi笑不攏咀，甜到漏!

趁Sammi到後台換衫的時候，口才出眾的Wyman獨霸舞台表演楝篤笑，他說：「我一生用好昂貴既代價去做一個有型既人…(全場笑聲)呢個唔係笑點嚟架，應該喊架!我付出咗咩代價呢?例如我碌盡一生既人情咭搞個紅館演唱會，為咗咩?為咗有型之嘛!又或者每年飛去歐洲睇時裝表演，我為咗有型之型之嘛!又或者我千辛萬苦，死都唔簽返TVB，有型囉，為咗唔畀機會佢哋要我做一個15點既節目!」全場笑聲和掌聲，他續說：「我就係一個咁著重有型既人，我同鄭秀文既電影故事開始啦，其實好短，因為我哋只係拍過一部電影…(台下觀眾大叫：《愛你愛到殺死你》)好記性!」他表示當時接到劇本一看就發現問題，說：「個角色名，我好唔鍾意!(台下觀眾大叫『奶媽』)嗱嗱嗱，就係嗰兩個字啦，今晚係唔可以講呢兩個字，我就係嚟洗底!」

Wyman自言一生行有型，怎可以被這個角色名字破壞形象，於是他與導演理論和要求改名，但導演一意故行，更游說他：「當時導演話個角色只係嗌一次，2秒，煙消雲散，冇人察覺，當被鬼責!好，我拍。到首映當日，嗰段戲出咗場之後我去洗手間避一避風頭，完事臨離開洗手間之際，有個猥瑣男人對住我陰陰笑!」之後電影上映大收旺場，落畫後至今18年仍在全亞洲各電視台不斷重播，Wyman坦言早前在街上仍被人嗌這個名字，台下觀眾大叫「奶媽」，他認真地更正說：「冇奶架!好似係『契』架咋!不過我今日諗通咗，鄭秀文，呢個香港歷史上，甚至係全世界最有型既女歌手，都有型咗40幾年(笑聲)…咁有型既女歌手，揀電影拍檔都要有型，所以我欣然接受，從此大家喺街上見到我請大聲嗌呢兩個字…(台下觀眾大叫『奶媽』)係『有型』呀!」

他介紹Sammi出場：「有請全宇宙最有型既女歌手…朱金梅(《愛你愛到殺死你》裏Sammi角色名字)!」全場爆笑。