余文樂為拍廣告 chok爆踢足球 (附圖輯)

眾所周知，余文樂有隊籃球隊叫做「橫洲工業」。眾所周知，余文樂的「橫洲工業」是打籃球的。眾所周知，這隊「橫洲工業」代言運動飲品「水動樂」。不說不知，今年「橫洲工業」竟在廣告片一反常態，不但耍花式籃球，甚至「轉行」踢足球！

余文樂連續第三年帶領籃球隊「橫洲工業」為運動飲品「水動樂」拍代言廣告，每年主題都不同，今年適逢世界盃6月在巴西舉行，主題就將兩球結合，為增添趣味性，「橫洲工業」更拉隊練習花式籃球，讓觀眾耳目一新的感覺。

三個月前，阿樂已率領隊友秘密練兵，練習花式籃球姿勢與技巧，然後分開幾天拍攝硬照和電視廣告(TVC)，由朝拍到晚，務求鏡頭前做到滿分，阿樂和隊友到埋位拍攝前一刻還在研究動作和走位，就算攝影師要求他們連續拍球幾百次，手掌紅腫亦毫無怨言，非常認真。

阿樂說：「今年第三年同『水動樂』合作，好高興，因為keep住咁多年好好關係係好難得，需要互相信任和有信心。今年最特別係個構思唔同咗，集中咗喺籃球動作上花巧啲，有啲街頭style。」由於阿樂與隊友在正式比賽中不會使用花式動作，所以他們事前要特訓，阿樂說：「平時打波唔容許我哋做呢啲動作，我哋好似馬戲團，要重新練習，一齊去上堂！(鏡頭前拍咗幾百吓波，手掌都紅晒，辛苦嗎?)唔辛苦，以前練波都係咁，習慣咗。相比起來，花式籃球好難，無乜把握，所以拍TVC要花更多時間。」

在影樓拍攝硬照後，廣告隊轉場到真正的籃球場拍攝TVC。除了一如以往，阿樂在鏡頭前chok爆打籃球和飲飲品，但今次他竟然還出腳踢足球！雖然只是一個鏡頭，阿樂顯得異常認真和緊張，終於拍了幾個take導演滿意收貨。事後阿樂接受訪問，他引用周星馳經典電影對白，搞笑地說：「今年舉行世界盃嘛，佢哋問籃球加足球有冇得諗?有得諗喎，所以今次廣告我要射足球！」身旁的隊友Dave和阿彬透露每位隊員都學一招半式花式籃球，他們你一言我一語：「有時一個人拍幾個波，有時又要互相穿插走位，但感覺就好像亂咁拍和亂穿插。」阿樂補充說：「最重要我哋要好合拍！」問到今次拍廣告比以往艱辛，酬勞有沒有「加碼」?阿樂笑說：「有呀，加多咗一個飯盒和油菜，仲有飲品任飲！」學到的花式會否加入平常賽事裏，擾亂對手?他們異口同聲否定，說：「唔可以加入平時既戰略，因為有啲動作唔可以喺正式比賽裏做，比賽就實際少少。而且有時不切實際，未必射得入個波。」

阿樂還透露計畫加強推廣和教育工作，他說：「今年『橫洲工業』唔止比賽，仲會將技術教畀小朋友，因為佢地係我地既未來，希望抽多啲時間全隊一齊去學校或屋村教打籃球，以前自己好希望有人教正統既技術。因為運動員生涯唔係好長，趁未到尾聲就去教育下一代，如果遇到有潛質既球員會推介畀其他球隊。」他還笑言組「橫洲工業Junior」承傳下去。而在球場拍攝TVC當日，其中一位隊友的小兒子探班，阿樂即父愛泛濫，對小朋友又攬又錫，還將自己腳上的特別版球鞋讓給小朋友穿上，非常搞笑，問阿樂會否將自己的珍藏球鞋留給將來的兒女?他說：「留唔到，雖然我保養得啲鞋好好，但留咁耐會爛。(咁其他嘢呢?跑車和靚衫?)無所謂，乜都留晒畀佢哋！」