C AllStar 豆腐火腩修身法 1個月減 6KG (附圖輯)

為籌備處男紅館騷「我們的胡士托演唱會」，C AllStar 積極綵排和練歌，務求以最佳狀態演出。早前他們為今日(21日)推出的新曲加精選唱片拍攝封面照，期間更自爆地獄式修身秘方，竟然是全隊四個大男孩只食一盒「豆腐火腩飯」，果然是「男人的浪漫」!

拍攝唱片封面當日，C AllStar四子穿著招牌「煲呔look」現身，非常醒目有型，晚飯的時候，工作人員安排他們四子只分享一個飯盒，陳健安(安仔)一唱：「豆腐火腩飯?」何建曦(Jase)一和：「男人的浪漫!」修身成功，短短一個月減磅達6公斤的安仔揚言為開騷四子節食，他笑說：「平時我地一隊人食五盒飯!」為何四個人卻食五盒飯呢?釗鋒解釋：「因為我平時要多飯多肉多菜，咁索性叫多一盒飯先至夠食!」安仔續說：「為咗演唱會，我哋依家四個人先得一盒飯，好大犧牲呀!而喺四個人之中，我只係負責攞住盒飯，同埋聞飯香，冇份食，啲飯好香呀!」吳崇銘(King)笑說：「我負責食飯，因為我一定要食飯先至夠氣力唱歌!」不過被Jase取笑：「因為你成舊飯咁!」梁釗鋒揚言最愛食火腩，他得戚地說：「因為我份人平時同個『腩』字扯唔上關係!」自命食極唔肥的他，卻遭其餘三子起哄反對,異口同聲指他：「你唔腩(濫)?!」事關四子之中，只有釗鋒被傳過緋聞，難怪對於兄弟們的圍攻亦無力反抗，惟有尷尬地傻笑!

這張新曲加精選唱片由C AllStar與監製一同挑選歌曲，釗鋒的心水之選是《別讓小島沉沒》，原因很簡單，他說：「好聽!」而Jase就揀了最classic的《顏色》，King說：「我就最鍾意《音樂殖民地》，呢首係C AllStar第一首電子曲風既歌!」至於安仔當然選了自己的作品，他說：「我梗係揀《2013的約定》，呢首係我第一次作曲而被收錄入碟既歌，所以對我有多重意義!」既是新曲加精選，當然就有新歌，第一首是側田監製的演唱會宣傳歌《時日如飛》，MV由演唱會導演莊少榮主理，安仔媽咪更粉墨登場參與演出，另一首新歌就係演唱會主題曲《星海》，他們期待紅館全場大合唱的震撼效果!