王菀之捱兩晚通宵拍廣告（附圖輯）

王菀之忙為新專輯《晴歌集》宣傳之餘，又要拍劇、拍電影和舞台劇，但她仍然精神飽滿，事關廣告商垂青邀請她擔任代言人，不但有豐厚酬勞，而且還有源源不絕的龜苓膏，老火湯，涼茶等滋補美食任由她享用。日前她為「鴻福堂」拍廣告，連續兩晚通宵都沒有怨言，而且越拍越起勁，因為美食當前，菀之在導演一聲令下，要連環將枱上的滋補美食統統掃清，十幾秒內又飲又食還要做表情，她都交足功課，豈料卻被一片小小的青椒連累NG，她非常無奈!

為了讓菀之可以一口氣享用全部「鴻福堂」出品的滋補美食，導演準備了一張很長的餐枱，枱下有路軌，菀之一邊品嚐長枱上的食物，工作人員就聽導演施令推動長枱，就如手動美食輸送帶，每隔幾秒就要換另一款食品或飲涼茶。雖然是高難度動作，但她仍然順利完成，豈料導演卻不收貨，原來罪人是一片青椒，菀之無奈地說:「呢片就叫做『NG的青椒』，我好快咁食好多嘢，本來好順利，但就係佢突然飛咗出嚟，累我NG咗個good take，今次NG唔關我事架!」期間好朋友導演麥曦茵探班，令她既開心又感動，將「被NG」事件拋諸腦後了。

事後菀之興奮地說:「未試過拍一個廣告咁滋補，有涼茶和龜苓膏啦，有湯水又有飯食，呢兩日都拍咗好多長時間，我好容易肚餓，但今次好多嘢食，所以拍攝非常順利。最近我除咗拍廣告和為新專輯《晴歌集》宣傳，仲要拍劇、拍電影和舞台劇，用好多時間和精力去演，我好畀心機，所以要食啲嘢嚟補充，剛好要拍呢個廣告，真係非常啱timing!接下來又要籌備再下一張專輯，所以好忙，但又好開心!」

又拍平面又拍電視廣告，菀之除了酬勞袋袋平安，還帶挈公司上下同事有口福，她說:「廣告商送咗好多滋補美食畀我同埋公司同事，大家都好開心，我仲會攞一啲去孝敬畀我喺我既專輯《晴歌集》翻唱佢哋金曲既前輩添!(包括張敬軒?)佢?我想送軒仔內衣褲畀佢多啲!事關佢幫我喺翻唱佢首《迷失表參道》MV時，佢無聽導演話，穿少布而優雅既內衣褲拍攝，可能佢無見得人既內衣褲啦，所以我會送一套畀佢，希望佢將來啱用啦!」