何韻詩《Memento Live 2013》第2場 全場大合唱 阿詩感動落淚 (附圖輯)

何韻詩《Memento Live 2013》前晚在紅館舉行第二場騷，好友黃耀明、盧凱彤、C AllStar、趙式芝(GiGi)、楊如芯(Sean)和與阿詩合演舞台劇《賈寶玉》的十二金釵成員拉隊捧場，看到成班好朋友撐場，阿詩異常風騷，還佻皮地拿明哥開玩笑。當她在台上孭起結他準備唱歌，說：「我係一個內向和怕醜既人!」全場大笑，阿詩續說：「你哋咪以為我講笑，我師傅(梅艷芳)以前話我唱歌無感情，叫我搵拖拍，但呢啲嘢。。。唉!直到2005年參與舞台劇《梁祝下世傳奇》，終於學識表達情感，劇中翻唱《禁色》，而原唱者就喺現場，明哥!」全場拍掌，阿詩隨即笑說：「不過今晚唔係唱呢首歌喎，哎呀，我喺佢面前咁講好似落佢面添!哈哈!其實今晚係唱陳百強既《愛沒有不對》。」提到翻唱，阿詩表示剛推出一張全翻唱師傅梅艷芳金曲的新專輯《Recollections》，不過她欲言又止：「都係唔好講，一講我怕自己忍唔住!」原來她怕自己會當場哭。

阿詩整晚刻意迴避感性的話題，豈料當她唱《滿地可》時，全場大合唱又齊整地揮動螢光棒，被台下觀眾感動突然流下眼淚，而且一發不可收拾，她說：「哎呀，開咗個制!」工作人員立即送上紙巾，她一邊抹眼淚一邊笑說：「人老咗係感性啲，呢刻我係咪好女人呢?!」抹完眼淚她續說：「好開心見到好多好多人對我信任和支持，無論你地純粹喜歡我既歌、朋友送飛畀你睇、還是喺我既歌每日陪住成長既忠實Fans，我都好多謝你哋!我唔係希望要做到十幾廿場演唱會。

只係想做一個我自己好喜歡既紅館演唱會，係你哋將呢三晚密密咁填滿，我希望你哋喺我既歌曲入面，除咗聽到我的經歷之外，仲喺入面攞到一啲喺你哋生活用到既力量。希望你哋同我一樣去變得更加堅強，更加好，唔好被生活磨滅，捉緊自己相信既一切，希望你哋過一個快樂的人生!」然後全場大合唱《木紋》。

「安哥」時阿詩再出場，唱了第一晚沒有唱的《喜歡喜歡你》，她一邊唱一邊和觀眾握手，然後她笑說：「你哋今晚有賺啦，噚晚無握手架，今晚仲唱多咗一首歌添!」原本風騷的阿詩鳴謝時老貓燒鬚，一時興奮幾乎忘記鳴謝名單,要工作人員透過耳機提水才恍然大悟，全場爆笑。最後全場大合唱《光榮之家》，為第二晚演唱會畫上完美句號!