何韻詩為紀念恩師，已故天后梅艷芳逝世十周年，今年特別製作一張唱片，收錄她翻唱梅姐部份經典歌，當作一份交給師傅的功課。其中《似是故人來》最令阿詩愛不釋手，她不但選這歌作為唱片第一首派台歌，更特別邀請梅姐生前好友關錦鵬和張叔平等大師，拉隊到北京拍MV，並於本月30日(星期一)在九龍灣展貿中心舉行首映禮，與歌迷見証她這份「非一般」功課的誕生！
這個MV特別選在北京的一間古跡舊屋拍攝，阿詩穿上Low cut長裙，穿梭於充滿懷舊感覺的拱門、紅磚牆和長走廊，與《似是故人來》的歌詞意境非常配合。阿詩說：「呢首歌對我意義好大，勾起好多情懷和思念，MV亦要有別一般自己既歌曲。因為我好想搵一位好明白我呢種情懷既人做導演，喺我最煩惱之際，朋友就建議我請關錦鵬導演。佢不但同梅姐合作電影《胭脂扣》，私下熟絡，而且佢好錫梅姐，但佢係大師級導演，閒閒地拍一個MV都幾十萬元，而且仲要係超級大製作，我哋邊度有咁多budget? 但我反覆思量，佢的確係最佳人選，於是我拍拍心口走去搵關導演傾，佢不但爽快答應，仲知道我哋budget有限而唔收人工，令我非常驚喜！」
驚喜可謂一浪接一浪，關錦鵬愛錫梅姐，連阿詩亦受惠，阿詩說：「關導演唔止自己免費幫我拍MV，仲親自搵埋張叔平幫手，阿叔亦都係無收人工錢。另外，仲有圈中有名既攝影師小Dee，同埋另一著名導演黃精甫幫手做後期，阿關幫我揼咗好多人心口，統統免費！」雖然碌盡人情咭，為阿詩慳近百萬元『星級班底』的開支，但飛赴北京取景、道具和其他工作人員等配套開支，結果令MV嚴重超支達六位數字，但她義無反顧，說：「呢首歌既MV製作費比平時多好多倍，但我好想將呢首歌做到最好，所以把心一橫將所有資源投放晒落一首歌！」
得到各方的支持令阿詩好感動，她說：「雖然梅姐走咗一段時間，但大家依然記掛住佢，好懷念佢，好願意為佢付出一份力，本來呢張專輯同埋呢首歌，只係我自己對梅姐一份思念既功課，但因為阿關，同埋大家唔計較地幫手，變成大家合力為梅姐做既一份禮物。希望30號首播當日，觀眾都能感受到呢份咁特別既禮物。」
