鄭伊健、陳小春、謝天華、錢嘉樂和林曉峰(阿Lo)，因為20年前合作拍一系列電影而成為好朋友。他們由當年幾個死0靚仔，搖身一變成熟穩重Family Man。伊健今年初娶老婆、嘉樂和小春分別在三月和七月榮升老豆，今年十一月五子將再添喜事，他們決定踩入紅館舉行《歲月友情演唱會》，更揚言一反傳統拒絕操肌，誓將演唱會變曬腩大會，分享男人的浪漫！
日前五位型男為演唱會在柴灣影樓拍攝海報，伊健、小春、天華、嘉樂和阿Lo先後抵達，首先各自穿以背心影單人大頭相，之後他們換上型爆黑色皮褸，Man味十足。期間他們互相借衫，又替對方襯衣服和指導擺甫士，比自己埋位更緊張。鏡頭後，阿Lo和嘉樂向新手爸爸小春傳授湊仔經，伊健和天華就分享潛水心得，有說有笑。期間他們更即興Jam歌，《友情歲月》、《戰無不勝》、《刀光劍影》和《一起飛》等幾首電影系列的歌曲，尤其是《友情歲月》時，小春唱主音時，伊健唱和音，阿Lo耍口技扮樂器聲，天華吹口哨，嘉樂打拍子，默契十足。
五子合體接受訪問時，首先互相恭喜一番，非常熱鬧，嘉樂說：「今年喜事特別多，首先係連鄭伊健都結婚，恭喜恭喜，然後到小弟，我做老豆，哈哈哈！最新鮮熱辣係小春都做埋老豆，真係喜事一件接一件！」伊健說：「十一月又有喜事呀！」嘉樂興奮地說：「今年我要做歌星！」天華亦說：「今年要踏入紅館呀！」此時小春電話響起，他轉身躲在一旁細細聲講電話，卻被嘉樂踢爆是他的老婆大人來電，還被伊健笑他「陳小親」，做了老豆之後經常拿著電話「親親」。阿Lo繼續搞笑：「我今年會跟佢哋四個入紅館……送花籃！其實我哋係踏入紅館開演唱會，構思和呢件事既大腦鄭伊健！」伊健卻爆料指原來他構思這個演唱會是因為小春一句說話：「其實本來大家話不如一齊搞個騷敍舊，玩吓啦！點知陳小春話紅館先至做，於是我哋咪去紅館囉！」
除了揀歌和排rundown，他們最緊張是邀請嘉賓一環，越數越多，三小時表演時間實在不夠，伊健說：「我地識咗20年，當初因為一部電影拉埋一齊，所以今次演唱會好想搵返拍過呢個系列電影既朋友嚟敍一敍！」雖然他們表示名單還未落實，但伊健日前出席活動時率先開口邀請戲中情人舒淇上台做嘉賓，至於另一位「情人」黎姿已結婚生BB淡出幕前，伊健說：「就算唔上台表演都會邀請喺觀眾席欣賞，一齊開心，仲想請莫文蔚、吳君如、朱永棠、吳鎮宇、萬梓良、李修賢、鄭浩南和張耀揚等等，真係數極都數唔晒！」
在演唱會晒肌似是例行公事，伊健每次開騷都會晒肌載歌載舞，他們五個豈不是30舊腹肌冧爆粉絲?嘉樂笑說：「興瘦和興晒六舊腹肌，都興咗二十年啦，今年我地一反傳統，騷肚腩！」語畢，五子作狀捧起肚子，阿Lo說：「幾時見過紅館開騷會有幾條茂利個肚腩凸咗出嚟?我哋要打破傳統！」近年因為陪老婆養胎，連自己都養了個小肚腩的小春當然最開心，他立即附和：「我有乜所謂呀！」
五子之中，伊健一直保持六舊腹肌，為這次紅館騷要他將腹肌變肚腩犧牲色相，嘉樂故意加以挑釁：「你夠唔夠膽呀，鄭伊健?」伊健為兄弟的確在所不辭，他捧起肚子立即示範。嘉樂踢爆有人會出爾反爾：「如果十一月真係咁樣，我真係佩服你哋，唔好陰陰地去密秘操弗，練六舊腹肌！」點知被伊健悉破奸計：「你唔好扮嘢啦，你唔想減之嘛！」其實拍海報期間，眾人都汽水零食不離手，嘉樂食炸雞髀和阿Lo食薯片，只有伊健勤做瑜伽動作，難怪嘉樂笑指他放棄一身健美線條實在有難度！
