許志安新歌《情人甲》曝光即被廣泛流傳，歌迷更急不及待將他與鄭秀文(Sammi)的舊片和相剪輯成MV頂癮，安仔日前為新歌拍在石澳拍MV，他讚嘆歌迷的心思，但更希望大家留意原裝正版，事關正版MV由填詞人黃偉文(Wyman)，導演莊少榮(細榮)和經理人敦啟華精心設計，由三個特別的愛情故事串連而成，安仔還希望足本版輯成微電影收錄在新專輯內。
日前安仔身穿白恤衫黑短褲皮靴現身石澳沙灘拍攝《情人甲》MV，雖然天氣炎熱，但亦有歌迷到沙灘見安仔，為他打氣，而MV中的愛情故事就由沙灘士多開始。平時喜愛曬太陽的安仔自爆經常到沙灘，他說:「今日嚟到香港著名美麗既石澳沙灘，我細個成日嚟，長大之後都會嚟，通常星期一至四，因為無咁迫人，開車嚟會方便啲，遊吓車河，睇吓風景歎杯奶茶都幾爽架!不過今日唔係嚟玩，係嚟拍MV!」對於早前《情人甲》MV還未曝光，有歌迷已急不及待將他和Sammi的相片和舊片輯成MV，安仔笑說:「歌迷成日都會將我哋P圖和PMV，好似之前Sammi喺電影《盲探》有張同枯髗頭劇照，啲歌迷又會搵到一張我著住枯髗頭衫既相Key埋一齊，又攞啲海報嚟P圖，甚至將我哋各自既MV剪輯埋做《情人甲》MV，雖然好有心思又剪得幾好，但我依家呢個先至係原裝正版，有故事串連精彩好多，仲有我真身對咀呢!」
安仔透露其實《情人甲》早於去年底已經錄好，想過收錄在BIG FOUR專輯內，但最後因為種種原因還是沒有，他說:「我自己好鍾意呢首歌，雖然無收錄喺之前既專輯，但一直放喺我心入面，終於依家帶佢出嚟見大家!」新歌曝光即被廣泛流傳，更有指是2013年年度之歌，安仔謙稱:「年度之歌就言之尚早，不過好開心有人咁鍾意呢首歌，旋律好好，而歌詞亦非常好。」而真詞人Wyman日前在微博留言:「《情人甲》注定是2013最有愛的一首廣東歌吧，不是因為我的詞填成怎樣怎樣，而是因為這是唯一一首寫成之後，激動地發短信來跟我說『很喜歡很感謝』的人並非歌手自己，而是他身邊最親密的那位，兩個人能夠做到這地步，只能說，彼此已不只是對方的『情人甲』，是真愛。祝福。」安仔感謝對方出手為歌曲錦上添花，他說:「其實Wyman喺微博講既嘢我已經回覆!我覺呢份詞係佢近年突出之作，講出每個人既愛情故事，多謝佢付予歌曲靈魂。」
為隆重其事，早前Wyman與導演細榮，還有安仔的經理人敦啟華認真地為MV開會，安仔說:「三位圈中舉足輕重既創作人走埋一齊研究，傾咗一個晚上，結果決定用一個特別方法去表達，佢哋一齊為個MV諗咗三個愛情故事，有共通點而且互相呼應。而我就好希望將呢三個故事最終剪輯成一部微電影，收錄喺我既專輯入面。」雖然有三個故事，但安仔佔戲份卻異常地少，他笑說:「導演剛才同我講:『唔好意思呀，安仔，你著到咁靚，但只係出三四個鏡頭咋!』其實我點會介意，最緊要個MV效果靚!」MV的第一個故事前日已率先網上曝光，男主角馬志威除了與女友車沅希有一段兩小無猜的愛情故事外，還洩露了他與一位舊同學的男男戀曖昧情緣，為第二部份故事埋下伏線。
三人合照的男女是MV演員，男馬志威，女車沅希。
藍白色橫間上衣是導演莊少榮(細榮)。
