余文樂屋村場景拍廣告 感恩天公做美

近日連場大雨，但沒有影響余文樂和他的籃球隊「橫洲工業」拍攝運動飲品水動樂的進度，事關天公造美，落大雨的日子好是拍室內場景，而正好要拍外景的時候便天朗氣清，令阿樂和隊友都非常感恩，他們爭取時間在陽光充沛的時候拍攝，寓工作於娛，加上阿樂和不少隊友都在屋村籃球場打波長大，所以這天在香港仔的舊式屋村籃球場拍攝時，他們都份外投入，導演叫cut仍繼續走籃入球，欲罷不能。而場邊除了工作人員，也有街坊捧場，還有師奶阿叔從屋企鐵閘探頭出來看熱鬧，而且每當有人入球都會贏得這班臨時觀眾掌聲，感覺好像真正賽事正在舉行中。

拍攝當日戶外溫度超過30度，在烈日當空下打波，阿樂滿頭大汗大呼過癮，正好拍攝的是運動飲品，於打波滿身大汗後要拍飲用水動樂近鏡，正好即時補充失去的水份及電解質，又能繼續拍其他鏡頭。他說：「前幾日拍室內就一直落大雨，今日拍外景就陽光普照，真係好，一直都擔心天氣唔好，因為地面濕滑，好易跣腳會有危險，而且喺太陽底下打波，出一身大汗好正！」

在屋村拍攝勾起阿樂不少童年回憶，他說：「細個無錢，去屋村球場打波唔使錢玩成晚，我地好多隊友都係屋村籃球場長大，當年喺球場打波唔識都可以一齊玩，好簡單。今日再嚟屋村打波，個個都變返細路，導演嗌cut都聽唔到，投入到無理會鏡頭，好過癮！」當年打波有沒有女fans捧場？阿樂擘大眼否認：「無架，嗰陣時籃球場邊度有女仔嚟架？除咗我哋班打波既男仔，搵多隻貓路過都無，不過曾被人蝦，趕我地走硬搶球場打波！（咁你點做？）細路仔梗係走人啦！」

以前無女fans捧場，長大後有無女友到場邊打氣，欣賞他打籃球的英姿？阿樂說：「無呀，我唔鍾意叫女友睇我打波，我打波唔係為有咩人喺場邊嚟睇，而係為咗同班隊友打波開心，所以我無主動叫人嚟睇，亦唔鍾意叫人嚟睇我打波！」