余文樂周柏豪拍運動飲品廣告 出汗出到面濕濕 (附圖輯)

由余文樂與周柏豪牽頭纜的籃球隊「橫州工業」，Full Team 上陣為運動飲品水動樂拍廣告，日前他們拉隊到影樓影廣告硬照，再到球場拍電視廣告。眾人表現認真，阿樂為營造汗流狹背的效果，拿着噴水壼向自己的臉上和雙麒麟臂狂噴水，面對鏡頭時chok到爆，而柏豪就重複練習各式型仔投籃動作，大家都非常落力。

阿樂與柏豪早前由好兄弟變緋聞情敵，而拍攝廣告當日，中場休息開餐時，雖然坐在同一張梳化，中間只是相隔一名隊友，但柏豪埋首玩手機，而阿樂就撩影樓貓咪玩，各不相干，難道如傳聞所指他們為爭女面阻阻？阿樂連聲否認說：「黐線！」柏豪笑說：「邊度有面阻阻呀？今日拍廣告主題係『汗』，我哋咁出汗，好wet，出汗出到面濕濕就真！」。

之後他們應記者要求合照時，風騷的阿樂向柏豪作狀出擊，柏豪轉個臉懶理，非常搞笑！

訪問時阿樂搞笑地說：「今年水動樂廣告除了平面硬照，仲有電視廣告，讓隊中一向低調而又少曝光既隊友演出，真係好大膽，哈哈！其實成班人一齊做啲好鍾意既事，將平時諗到既事實踐出嚟，好有滿足感，而且今次我抱住一半工作一半玩既心態，好開心！」柏豪稱：「廣告商去年贊助『橫州工業』舉行籃球賽，今年會再接再勵，而且更大型，相信外界會有好大回嚮。除咗為隊友留下美好回憶，更為年輕人在暑假期間舉辦一些有益身心的活動！」

阿樂自爆：「我借呢次拍廣告機會，詐詐帝帝攞個期同班朋友一齊玩。」柏豪說：「近年打籃球氣氛好濃烈，上網成日睇到好多賽事，能夠打波的時候我會爭取機會去打波，唔好畀自己懶，有時見到網上片段有啲六、七十歲打籃球的叔父輩都好落力，自己廿幾歲都要努力！」在旁的阿樂即窒住：「你就廿幾歲，我就卅歲，唔好再提年紀啦！」柏豪笑說：「提到年紀佢就面阻阻！」