為香港樂壇貢獻大量賣座歌曲的雷頌德將於6月21至23日香港體育館舉行「雷頌德THANK YOU演唱會」，一向人緣甚廣的Mark早前拍攝海報，並得到一眾圈中好友齊齊撐場，頭炮已有多年死黨黎明及靚媽陳慧琳拍攝首輪海報，現在又請來Big Four、及以情侶檔姿態唱盡大街少巷的方力申和鄧麗欣、唱家班、衛蘭和JW，還有組合Rubber Band為海報拍攝。
雷頌德（Mark）早前為「雷頌德THANK YOU演唱會」拍攝海報，在其一呼百應下，多位曾合作過的歌手也義不容辭的度期拍攝海報，其實除了海報上的好友參與演出外，古巨基、盧巧音、李治庭及羅敏莊等亦一口答應演出，Mark笑言，演出名單有如一首歌的歌詞般長，因為過往合作的歌手實在太多。
最近忙於於內地工作的方力申與鄧麗欣拍攝當日，兩人以襯到絕的黑色打扮示人，而Stephy的性感半透視打扮更令人眼前一亮，Mark說：「今日係拍攝嘅第一日，仲請咗一對金童玉女，或者可以稱呼佢哋痴男怨女啦，其實我哋淵源就唔使點講，最勁係將佢兩位變咗合唱歌嘅組合咁」。
Stephy聞言笑說：「其實我之前細個同阿Mark合作好驚佢，因為佢好有威嚴，一講到音樂上面又會好執著」。小方則說：「我試過一次登台唱5首歌，之後即刻打返比佢，因為好似開雷頌德音樂會咁，Fans好鍾意佢嘅作品。其實今次個騷位位都係天皇巨星，有份真係光榮，同埋我哋都已經兩年冇出唱片，希望可以藉今次東山再起啦」。
阿Mark又透露首張任監製的唱片就是張衛健的《180度+》，Dicky笑說：「就係靠呢張唱片插入谷底喇，但係絕對贏到口碑。我覺得當時嘅Mark係好有熱誠同大膽嘅音樂人，因為當時佢用10個唔同國家音樂類型嘅音樂幫我做10首歌」。而安仔則說：「我最記得當年正東年代，Mark第一首幫我寫嘅《我的天 我的歌》，雖然演唱會主題係Thank You，但係其實應該係我哋多謝阿Mark先真」。Mark回應道：「佢哋喺台上都成日有多謝我，但係我真係好感激歌手1對我嘅信任，同埋佢哋咁比心機去演繹」。
之後兩人又開始搞笑，健仔指雷頌德如同一個人的心臟，安仔即插咀說：「生物堂咩而家？！咁你係一個腎囉，個頭成個腎咁樣，阿公就似係個肝，因為個樣好衰竭呀，Edmond就似係排肋骨」。健仔即說：「咁你仲唔係個鼻？！」而阿公(蘇永康)原來與Mark相識逾20年，他說：「其實佢大學畢到業我都有功勞，當時佢未畢業就想返香港做音樂人，雖然當時佢做啲音樂幾好聽，不過佢仲打算唔讀，但係比我制止佢。其實佢老本行係讀建築嘅，但係到底你有冇起過啲咩出嚟架？」
至於三位年輕後輩應昌佑、衛蘭和JW，則可算由Mark引領入行，JW說：「其實好好笑嘅係，因為Mark自己會唱埋Demo，錄音時耳筒就會聽到佢把聲，感覺好搞笑」，Mark即回應說：「我係比信心你哋，因為你哋一定會唱得好聽過我吖嘛」。而Rubber Band一向自己作曲，阿Mark解釋說：「其實我冇寫歌比佢哋，但係有啲歌我真係好想佢哋幫我演繹，所以我都好期待表演當晚，有幾首大家諗都諗唔到嘅歌由佢哋表演」。
圖輯：
