AKB48總監督來港 橫山由依想喺香港開AKB48演唱會

日前(8日)，香港舉行相隔一段時間的AKB48粉絲見面會。每次的粉絲見面會都會有幾位成員來港。今次來港的成員來頭一啲都唔細，由AKB48的現任總監督橫山由依，連同兩位早前已經宣布畢業，並於將來離隊的成員木崎由里亞及島田晴香來港。在機場早有不少粉絲帶同自製的巨型橫額﹑扇﹑成員的寫員集等到場，在場粉絲大部分都係內地的粉絲，睇黎佢地已經等到頸都長埋，因為對上一次橫山由依來港已經係2010年嘅事，當年橫山仲係AKB48的研究生，如今佢已經登上成員中最高位置的總監督，相隔接近7年再度來港。成員一出接機大堂立即引起哄動，佢地一見到粉絲為佢地準備的橫額，都急不及持上前合照，之後粉絲向佢地送上花束同公仔，佢地收花同公仔都收到手軟，最後由保安人員護送下上車出發前往見面會的會場。

記者:Wilson Lo

而喺見面會會場已經一早有粉絲到場排隊，希望入場霸個靚位睇到三位成員的風采。當中更有粉絲以出位的裝扮去參加見面會。活動開始，主持Soko（和泉素行）聯同三位成員同粉絲進行互動，在提問環節開始時木崎透露其實前幾日佢患上感冒，當日其實係抱恙來港，把聲都仲有少少沙，病住都想同粉絲見面，三位成員亦都大讚香港粉絲熱情又溫柔，仲特意去接佢地機，粉絲聽到心都冧埋啦。

被問到兩位畢業離隊的成員木崎由里亞及島田晴香，特別係島田晴香畢業後亦會退出娛樂圈，問兩位畢業之後想做啲乜，木崎表示畢業之後想好好培養自己的演技，成為一個女演員，希望以後做到香港電影的女主角；而島田就想喺畢業之後去唔同的國家體驗當地的風土人情，而佢慨嘆今次來港的時間只有一日實在太短，話畢業之後會再黎香港，到時喺香港慢慢玩咁話喎。橫山就對兩位成員畢業表示，雖然兩位一直支持住AKB48多年的成員離隊係有啲可惜，但係見到佢地將會為咗自己嘅未來而努力，以及享受人生，佢都為此感到欣慰。

至於畢業前想做乜，一向以「笨蛋」著稱的木崎由里亞就忽發奇想話想喺香港搞齋講廣東話的握手會，橫山同主持聽到都得啖笑，仲即刻測試下木崎啱啱學咗嗰幾隻唔鹹唔淡嘅廣東話；島田就話想搞香港美食團，同粉絲食勻香港美食。而喺爆料環節，問成員如果唔做幕前，做幕後的話邊個位會啱佢地同唔啱佢地，成員就大爆橫山真係唔識襯衫，肯定做唔到服裝設計師，反而木崎就幾有潮流觸覺，佢本人仲話佢而家幫緊手準備緊佢畢業演出嘅服裝添，島田就大爆木崎因為性格幾男仔頭，所以做飯堂阿嬸都幾啱喎。

橫山最後透露話想喺香港開AKB48的演唱會，話返到日本會向製作人秋元康進言幾句，粉絲聽到立即陷入瘋狂，至於未來能唔能夠喺香港睇到AKB48演唱會，就請大家拭目以待啦。